تقرری پر تنقید سے لاتعلق، سرفراز احمد کی توجہ بنگلہ دیش سیریز کی تیاریوں پر مرکوز

پاکستان ٹیسٹ ٹیم کے نئے ہیڈ کوچ سرفراز احمد نے اپنی تقرری پر ہونے والی تنقید کو مسترد کرتے ہوئے کہا ہے کہ ان کی تمام تر توجہ بنگلہ دیش کے خلاف آئی سی سی ورلڈ ٹیسٹ چیمپئن شپ 2025-27 کی سیریز کی تیاریوں پر مرکوز ہے۔

کراچی کے نیشنل بینک اسٹیڈیم میں واقع حنیف محمد ہائی پرفارمنس سینٹر میں تربیتی کیمپ کے دوران میڈیا سے گفتگو کرتے ہوئے سرفراز احمد کا کہنا تھا کہ کھلاڑی سے کوچ بننے کے سفر پر سابق کرکٹرز اور ساتھیوں کی اپنی آراء ہو سکتی ہیں لیکن وہ ان بیرونی تبصروں سے متاثر ہوئے بغیر اپنی نئی ذمہ داریوں کو بہترین انداز میں نبھانے کے لیے پرعزم ہیں۔

سرفراز احمد نے اپنی معاون کوچنگ ٹیم پر مکمل اعتماد کا اظہار کیا۔ انہوں نے کہا کہ عمر گل، اسد شفیق، گرانٹ لوڈن اور عبدالصمد سمیت پوری مینجمنٹ ٹیم کے ساتھ مل کر قومی ٹیم کو کامیابی سے ہمکنار کرنے کے لیے پرامید ہیں۔

پاکستان اور بنگلہ دیش کے درمیان دو ٹیسٹ میچوں پر مشتمل سیریز کا پہلا مقابلہ 8 مئی سے ڈھاکا کے شیر بنگلہ نیشنل کرکٹ اسٹیڈیم میں شروع ہوگا، جبکہ دوسرا ٹیسٹ 16 سے 20 مئی تک سلہٹ انٹرنیشنل کرکٹ اسٹیڈیم میں کھیلا جائے گا۔ موجودہ ورلڈ ٹیسٹ چیمپئن شپ کے پوائنٹس ٹیبل پر پاکستان دو میچوں کے بعد 12 پوائنٹس کے ساتھ پانچویں نمبر پر موجود ہے۔

بابر اعظم کی فارم کے حوالے سے پوچھے گئے سوال پر سرفراز احمد نے کہا کہ پی ایس ایل 11 میں بابر اعظم کی کارکردگی اور تکنیکی بہتری خوش آئند ہے۔ انہوں نے کہا کہ بابر اعظم کی ٹیم میں شمولیت کے بعد طویل فارمیٹ میں ان کے کردار کا تعین کیا جائے گا۔

پی ایس ایل 11 کے اختتام کے بعد کپتان شان مسعود، بابر اعظم اور فاسٹ بولر خرم شہزاد سمیت دیگر کھلاڑی جلد اسکواڈ کو جوائن کریں گے۔ سرفراز احمد نے واضح کیا کہ تربیتی کیمپ کا بنیادی مقصد نظم و ضبط اور بنگلہ دیش کی کنڈیشنز کے مطابق خود کو تیار کرنا ہے۔ ان کا ماننا ہے کہ ان کی کوچنگ کا حتمی فیصلہ میدان میں ٹیم کی کارکردگی کی بنیاد پر ہوگا۔

پاکستان کا ٹیسٹ اسکواڈ شان مسعود، عبداللہ فضل، عماد بٹ، اذان اویس، بابر اعظم، حسن علی، امام الحق، خرم شہزاد، محمد عباس، محمد رضوان، محمد غازی غوری، نعمان علی، ساجد خان، سلمان علی آغا، سعود شکیل اور شاہین شاہ آفریدی پر مشتمل ہے۔ ٹیم انتظامیہ میں مینیجر نوید اکرم چیمہ، ہیڈ کوچ سرفراز احمد، بیٹنگ کوچ اسد شفیق، بولنگ کوچ عمر گل اور فیلڈنگ کوچ عبدالصمد شامل ہیں۔