مصر: سانپ کے کرتب کے دوران ڈسنے سے جرمن سیاح ہلاک

مصر کے ساحلی شہر ہورغادہ میں ایک سیاحتی شو کے دوران سانپ کے ڈسنے سے 57 سالہ جرمن سیاح ہلاک ہو گیا۔ جرمن پولیس کے مطابق یہ افسوسناک واقعہ اپریل کے اوائل میں پیش آیا جب مقتول اپنے اہل خانہ کے ہمراہ چھٹیاں گزارنے مصر کے تفریحی مقام پر موجود تھا۔

پولیس حکام نے بتایا کہ ہوٹل میں جاری سانپ کے کرتب دکھانے والے شو کے دوران دو کوبرا سانپوں کو شائقین کے گلے میں ڈالا گیا تھا۔ اس دوران سانپ پکڑنے والے شخص نے ایک سانپ کو جرمن سیاح کی پتلون کے اندر جانے دیا جس نے اچانک ان کی ٹانگ پر ڈس لیا۔

سانپ کے ڈسنے کے فوری بعد سیاح میں زہر کے واضح اثرات ظاہر ہوئے، جس کے باعث ان کی حالت بگڑ گئی اور انہیں طبی امداد کے لیے ہسپتال منتقل کیا گیا تاہم وہ جانبر نہ ہو سکے۔ مقتول کا تعلق جرمنی کی ریاست باویریا کے ضلع انٹرا لگا سے تھا اور وہ اپنے دو رشتہ داروں کے ساتھ وہاں موجود تھے۔

جرمن پولیس اور پراسیکیوٹرز نے واقعے کی تحقیقات شروع کر دی ہیں اور حتمی رپورٹ کے لیے ٹاکسیکولوجی ٹیسٹ کے نتائج کا انتظار کیا جا رہا ہے۔ دوسری جانب مصری حکام نے اس واقعے سے لاعلمی کا اظہار کیا ہے۔

عالمی ادارہ صحت کے اعداد و شمار کے مطابق دنیا بھر میں ہر سال تقریباً 54 لاکھ افراد سانپ کے ڈسنے کا شکار ہوتے ہیں جن میں سے ایک لاکھ 38 ہزار افراد ہلاک ہو جاتے ہیں۔ ان ہلاکتوں کی بڑی تعداد کا تعلق بھارت سے ہے۔

علاوہ ازیں، حال ہی میں جنوبی کیلیفورنیا میں بھی سانپ کے ڈسنے سے تین افراد ہلاک ہوئے ہیں۔ ان واقعات میں پالوس وردیس اسٹیٹس میں پھول توڑنے والی خاتون، ارون میں بائیک سواری کے دوران 25 سالہ نوجوان اور تھاؤزنڈ اوکس میں ہائیکنگ کرنے والی 46 سالہ خاتون شامل ہیں۔