پاکستان سمیت مختلف ممالک میں اے لیول ریاضی کا پرچہ آؤٹ، کیمبرج کی تحقیقات شروع

کیمبرج انٹرنیشنل ایجوکیشن نے باضابطہ طور پر تصدیق کی ہے کہ اے لیول ریاضی کا پیپر 12 امتحان سے قبل ہی لیک ہو گیا تھا۔ اس واقعے نے پاکستان سمیت جنوبی ایشیا، مشرق وسطیٰ، افریقہ اور یورپ کے خطوں میں امیدواروں کو متاثر کیا ہے۔

بورڈ کی جانب سے جاری کردہ بیان کے مطابق اے ایس لیول ریاضی کے پرچے 9709 کو ضابطہ اخلاق کی خلاف ورزی کرتے ہوئے امتحان کے انعقاد سے قبل ہی سوشل میڈیا پر شیئر کیا گیا تھا۔ یہ پرچہ کئی ممالک میں ایک ہی وقت میں لیا گیا تھا جس کے باعث امتحانی عمل کی شفافیت اور ساکھ پر سنگین سوالات اٹھ کھڑے ہوئے ہیں۔

مذکورہ پرچہ بدھ کے روز امتحان سے تقریباً چھ گھنٹے قبل سوشل میڈیا پر گردش کرتا رہا۔ کیمبرج حکام کا کہنا ہے کہ وہ اس معاملے کو انتہائی سنجیدگی سے لے رہے ہیں اور لیک ہونے کے ذرائع اور وسعت کا تعین کرنے کے لیے ایک جامع تحقیقات کا آغاز کر دیا گیا ہے۔

ادارے نے اس بات پر زور دیا ہے کہ ان کی اولین ترجیح امیدواروں کو کسی بھی قسم کے نقصان سے بچانا اور امتحانی نظام کے تقدس کو برقرار رکھنا ہے۔ فی الحال اس بات کا جائزہ لیا جا رہا ہے کہ یہ مواد کس حد تک پھیلا اور اس کے تدارک کے لیے کیا اقدامات اٹھائے جا سکتے ہیں۔

امیدواروں کو ہدایت کی گئی ہے کہ وہ اپنے آئندہ امتحانات کی تیاری جاری رکھیں اور شیڈول کے مطابق امتحانی مراکز میں حاضر ہوں۔ کیمبرج کا کہنا ہے کہ کسی بھی تادیبی یا اصلاحی اقدام کا فیصلہ حقائق سامنے آنے کے بعد ماہرین کی ایک ٹیم کرے گی۔

بورڈ نے واضح کیا ہے کہ امتحانی بدعنوانی کے واقعات شاذ و نادر ہی پیش آتے ہیں، تاہم شواہد ملنے پر ملوث افراد، امتحانی مراکز اور امیدواروں کے خلاف سخت کارروائی عمل میں لائی جائے گی۔ یونیورسٹیوں اور دیگر تعلیمی اداروں کا گریڈنگ سسٹم پر اعتماد برقرار رکھنا ادارہ جاتی ذمہ داری ہے۔

کیمبرج انٹرنیشنل ایجوکیشن کی جانب سے تحقیقات کے حوالے سے اگلی اپ ڈیٹ جمعرات 7 مئی 2026 کو متوقع ہے۔