محکمہ موسمیات کے مطابق پیر کے روز اسلام آباد اور گردونواح میں زلزلے کے شدید جھٹکے محسوس کیے گئے، جس کا مرکز تاجکستان اور سنکیانگ کے سرحدی علاقے میں تھا۔ ریکٹر اسکیل پر زلزلے کی شدت 5 اعشاریہ 2 ریکارڈ کی گئی۔
زلزلہ پیما مرکز کے مطابق زلزلے کا مرکز 38 اعشاریہ 65 ڈگری شمالی عرض بلد اور 73 اعشاریہ 64 ڈگری مشرقی طول بلد پر واقع تھا۔ زلزلے کی گہرائی 128 کلومیٹر تھی اور یہ صبح 10 بج کر 56 منٹ پر ریکارڈ کیا گیا۔ جھٹکوں کے باعث شہریوں میں خوف و ہراس پھیل گیا تاہم فوری طور پر کسی جانی یا مالی نقصان کی اطلاع موصول نہیں ہوئی۔
ایک اور پیش رفت میں آزاد جموں و کشمیر کے مختلف علاقوں میں بھی زلزلے کے جھٹکے محسوس کیے گئے۔ محکمہ موسمیات کا کہنا ہے کہ اس زلزلے کی شدت 3 اعشاریہ 6 ریکارڈ کی گئی، جس کا مرکز مظفر آباد سے 12 کلومیٹر جنوب مشرق میں تھا۔ یہ زلزلہ 25 کلومیٹر کی گہرائی میں آیا اور اس کا وقت صبح 11 بج کر 29 منٹ تھا۔
پاکستان میں حالیہ مہینوں کے دوران زلزلوں کا تسلسل برقرار ہے۔ اس سے قبل 27 اپریل کو افغانستان اور تاجکستان کے سرحدی علاقے میں 5 اعشاریہ 7 شدت کے زلزلے کے جھٹکے اسلام آباد اور خیبر پختونخوا کے مختلف حصوں میں محسوس کیے گئے تھے۔
اسی طرح 3 اپریل کو ہندوکش کے علاقے میں 5 اعشاریہ 8 شدت کا زلزلہ آیا جس کے اثرات اسلام آباد، چترال، پشاور، سوات اور شانگلہ سمیت دیگر علاقوں تک پہنچے۔ گزشتہ ماہ بلوچستان کے ضلع خضدار اور ملحقہ علاقوں میں بھی 4 اعشاریہ 5 شدت کا زلزلہ ریکارڈ کیا گیا تھا، تاہم کسی قسم کے نقصان کی اطلاع نہیں ملی۔
فروری کے مہینے میں ہندوکش ریجن میں 5 اعشاریہ 6 شدت کے زلزلے نے جنم لیا تھا جس کے جھٹکے اسلام آباد، پشاور، سوات اور چترال سمیت ملک کے کئی شہروں میں محسوس کیے گئے تھے۔
عراق کے مقدس شہر نجف میں واقع حضرت علی علیہ السلام کا مزار زائرین کی…
واہگہ بارڈر پر معرکہ حق کی یاد تازہ کرنے کے لیے ایک پروقار تقریب کا…
امریکہ اور ایران کے درمیان جاری کشیدگی کے تناظر میں ایک اہم پیش رفت کے…
نیٹو کے سیکرٹری جنرل مارک روٹے نے کہا ہے کہ یورپی ممالک نے امریکی صدر…
متحدہ عرب امارات کی جانب سے واٹس ایپ کے استعمال کے حوالے سے اہم ضوابط…
بھارت کی پانچ ریاستوں اور علاقوں میں ہونے والے انتخابات کے نتائج کی گنتی سخت…