آبنائے ہرمز میں کشیدگی برقرار، عالمی منڈی میں تیل کی قیمتیں مستحکم

امریکی صدر ڈونلڈ ٹرمپ کی جانب سے آبنائے ہرمز میں پھنسے ہوئے بحری جہازوں کو آزاد کرانے کے اعلان کے باوجود عالمی منڈی میں تیل کی قیمتوں میں کوئی نمایاں تبدیلی نہیں دیکھی گئی۔ پیر کی صبح برینٹ کروڈ آئل کے سودے 108 اعشاریہ 11 ڈالر پر مستحکم رہے جن میں 0 اعشاریہ 06 فیصد کی معمولی کمی ریکارڈ کی گئی۔ تاجروں کا ماننا ہے کہ صدر ٹرمپ کا منصوبہ توانائی کے جاری بحران کو حل کرنے میں ناکام رہے گا۔

صدر ٹرمپ نے اتوار کے روز اعلان کیا تھا کہ امریکہ پیر سے آبنائے ہرمز میں جہازوں کو آزاد کرانے کے لیے پروجیکٹ فریڈم کا آغاز کرے گا تاہم اس آپریشن کی تفصیلات تاحال واضح نہیں ہیں۔ امریکی سینٹرل کمانڈ نے تصدیق کی ہے کہ وہ آبنائے سے گزرنے والے جہازوں کو معاونت فراہم کریں گے مگر بحری محافظ دستوں کی تعیناتی کے حوالے سے کوئی ذکر نہیں کیا گیا۔

اس آپریشن میں گائیڈڈ میزائل ڈسٹرائرز، طیارے، بغیر پائلٹ کے پلیٹ فارمز اور 15 ہزار فوجی اہلکار حصہ لیں گے۔ دوسری جانب ایرانی پارلیمنٹ کی نیشنل سیکیورٹی کمیٹی کے سربراہ ابراہیم عزیزی نے خبردار کیا ہے کہ امریکی مداخلت 7 اپریل سے نافذ جنگ بندی کی خلاف ورزی تصور ہوگی۔

برطانیہ کی فوج نے متحدہ عرب امارات کے ساحل کے قریب ایک آئل ٹینکر پر حملے کی اطلاع دی ہے، جبکہ اس سے قبل ایران کے قریب بھی ایک بحری جہاز کو نشانہ بنایا گیا۔ ان واقعات میں کسی جانی نقصان کی اطلاع نہیں ملی تاہم ایرانی دھمکیوں کے باعث آبنائے ہرمز سے گزرنے والی سمندری ٹریفک میں شدید کمی واقع ہوئی ہے جہاں سے دنیا بھر کی 20 فیصد تیل اور گیس کی ترسیل ہوتی ہے۔

اقوام متحدہ کی کانفرنس برائے تجارت و ترقی اور ونڈورڈ کے اعداد و شمار کے مطابق جنگ کے آغاز سے قبل یومیہ اوسطاً 129 جہاز اس راستے سے گزرتے تھے جن کی تعداد اب صرف 20 رہ گئی ہے۔ گولڈمین سیکس کے تخمینے کے مطابق تنازع کے باعث عالمی پیداوار میں یومیہ 14 کروڑ 50 لاکھ بیرل کی کمی آئی ہے۔ جنگ کے آغاز سے اب تک برینٹ آئل کی قیمتوں میں 50 فیصد تک اضافہ ہو چکا ہے اور ماہرین کا کہنا ہے کہ امن معاہدے کے بعد بھی توانائی کے ذخائر اور ایرانی بارودی سرنگوں کی صفائی میں وقت لگنے کے باعث قیمتیں بلند رہیں گی۔