وزیر اعلیٰ مریم نواز کی ستھرا پنجاب پروگرام میں کرپشن کے خلاف سخت انتباہ

وزیراعلیٰ پنجاب مریم نواز شریف نے ستھرا پنجاب پروگرام میں کسی بھی قسم کی بدعنوانی، غفلت یا انتظامی کوتاہی کو ناقابل برداشت قرار دے دیا ہے۔ ایک تقریب سے خطاب کرتے ہوئے انہوں نے کہا کہ صفائی ستھرائی شہریوں کا بنیادی حق ہے اور صاف ستھرا ماحول حکومت کی اولین ترجیحات میں شامل ہے۔

مریم نواز نے ستھرا پنجاب کو اپنے اہم ترین منصوبوں میں شمار کرتے ہوئے افسران کو ہدایت کی کہ اس پروگرام پر پورے صوبے میں موثر عملدرآمد کو یقینی بنایا جائے۔ انہوں نے انتظامی افسران کو مخاطب کرتے ہوئے کہا کہ وہ حکومت کی آنکھ اور کان ہیں اور حکومت کی کارکردگی کا معیار صفائی کے انتظامات سے ہی جھلکتا ہے۔

وزیراعلیٰ نے اس بات پر تشویش کا اظہار کیا کہ دو سال گزرنے کے باوجود پروگرام کی کارکردگی مکمل طور پر تسلی بخش نہیں ہے، لہذا ضلعی افسران اپنے اضلاع میں اچانک دورے کریں۔ انہوں نے کہا کہ یہ منصوبہ بین الاقوامی سطح پر پذیرائی حاصل کر چکا ہے اور اس کا مقصد شہریوں کے معیار زندگی کو بہتر بنانا ہے۔

ملازمین کی تنخواہوں کے حوالے سے مریم نواز نے واضح کیا کہ اگرچہ ورکرز کو بروقت اجرت ملنا ان کا حق ہے لیکن بدامنی یا افراتفری کی اجازت نہیں دی جائے گی۔ انہوں نے متعلقہ حکام کو تنخواہوں کی بروقت ادائیگی، گھوسٹ ملازمین کی نشاندہی اور دیہی و شہری علاقوں میں یکساں ترقیاتی کاموں کی ہدایت کی۔

مریم نواز نے بتایا کہ ستھرا پنجاب پروگرام کے تحت ایک لاکھ 75 ہزار سے زائد ورکرز کام کر رہے ہیں جن کی کارکردگی کی سخت نگرانی کی جائے گی۔ انہوں نے عید الاضحیٰ کے موقع پر صفائی کے خصوصی انتظامات کو یقینی بنانے اور ورکرز کے لیے یکساں ضابطہ اخلاق نافذ کرنے کا حکم دیا۔

وزیراعلیٰ نے خبردار کیا کہ فرائض میں غفلت برتنے والے افسران کو معطل کر دیا جائے گا، جبکہ بہتر کارکردگی دکھانے والے افسران کو انعامات سے نوازا جائے گا۔