پنجاب ترقی کے سنہری دور میں داخل ہو چکا ہے: مریم نواز

وزیراعلیٰ پنجاب مریم نواز شریف کا کہنا ہے کہ اللہ کے فضل و کرم سے صوبے میں ترقی کے ایک نئے سنہری دور کا آغاز ہو چکا ہے۔ صوبائی اسمبلی کے اراکین سے ملاقات کے دوران انہوں نے کہا کہ عوامی فلاح و بہبود کے منصوبوں کی تکمیل اولین ترجیح ہے۔

ارکان اسمبلی نے ستھرا پنجاب پروگرام کے تحت دیہی علاقوں میں صفائی کے جدید نظام کے قیام کو سراہا اور صوبے بھر میں تیرہ ہزار سڑکوں کی تعمیر و بحالی کے اقدام پر اطمینان کا اظہار کیا۔ مریم نواز نے خبردار کیا کہ ستھرا پنجاب پروگرام میں کسی بھی قسم کی کرپشن کو برداشت نہیں کیا جائے گا۔

وزیراعلیٰ نے بتایا کہ تین ہزار سے زائد مراکز صحت کو جدید کلینکس میں تبدیل کر کے طبی سہولیات کے معیار کو بہتر بنایا گیا ہے۔ انہوں نے واضح کیا کہ پہلا سرکاری کینسر ہسپتال اور نواز شریف میڈیکل سٹی کی تعمیر جلد مکمل کر لی جائے گی۔ انہوں نے مزید کہا کہ سرگودھا میں انسٹی ٹیوٹ آف کارڈیالوجی کا قیام اور ہر ضلع میں کیتھ لیب کی تنصیب سے دل کے مریضوں کو بروقت علاج کی سہولت مل رہی ہے، جبکہ فالج کے علاج کے لیے بھی ضلعی سطح پر سینٹرز قائم کیے جا رہے ہیں۔

مریم نواز نے کہا کہ اپنا چھت اپنا گھر سکیم کے تحت ایک لاکھ پچیس ہزار گھروں کی تعمیر تیزی سے جاری ہے۔ اس کے علاوہ اپنا کھیت اپنا روزگار منصوبہ بے روزگار اور بے زمین کسانوں کے لیے شروع کیا جا رہا ہے۔ انہوں نے کہا کہ الیکٹرک بس سروس کے ذریعے پنجاب کے دور دراز علاقوں کے عوام کو بھی سفر کی جدید اور مفت سہولیات فراہم کی جا رہی ہیں۔