جعلی تصاویر کا معاملہ: اطالوی وزیراعظم جارجیا میلونی کی مصنوعی ذہانت کے غلط استعمال پر تنبیہ

اطالوی وزیراعظم جارجیا میلونی نے خبردار کیا ہے کہ مصنوعی ذہانت کے ذریعے ان کی جعلی تصاویر بنا کر آن لائن پھیلائی جا رہی ہیں جو عوامی رائے کو گمراہ کرنے کا باعث بن سکتی ہیں۔ انہوں نے کہا کہ سیاسی مخالفین کی جانب سے بنائی گئی یہ مصنوعی تصاویر حقیقت کے طور پر پیش کی جا رہی ہیں تاکہ ان کی ساکھ کو نقصان پہنچایا جا سکے۔

جارجیا میلونی نے ایک بیان میں اپنی ایک ایسی ہی جعلی تصویر کا حوالہ دیا جس میں انہیں بستر پر نامناسب لباس میں دکھایا گیا تھا۔ اطالوی وزیراعظم نے اس واقعے پر ردعمل دیتے ہوئے کہا کہ یہ عمل ظاہر کرتا ہے کہ اب لوگوں کو نشانہ بنانے اور جھوٹ پھیلانے کے لیے کسی بھی حد تک جایا جا سکتا ہے۔

ان کا کہنا تھا کہ یہ معاملہ صرف ان کی ذات تک محدود نہیں ہے بلکہ ڈیپ فیک ایک انتہائی خطرناک ہتھیار ہے جو کسی کو بھی دھوکہ دینے، اسے مینیپولیٹ کرنے اور نقصان پہنچانے کے لیے استعمال کیا جا سکتا ہے۔ انہوں نے مزید کہا کہ وہ تو اپنا دفاع کر سکتی ہیں لیکن بہت سے ایسے لوگ موجود ہیں جو اس صورتحال میں اپنا دفاع کرنے کی صلاحیت نہیں رکھتے۔

وزیراعظم نے عوام پر زور دیا کہ وہ انٹرنیٹ پر کسی بھی مواد کو قبول کرنے یا شیئر کرنے سے قبل اس کی صداقت کی تصدیق ضرور کریں۔ انہوں نے اصول وضع کیا کہ کسی بھی خبر یا تصویر پر یقین کرنے سے پہلے تصدیق کریں اور اسے آگے بھیجنے سے پہلے سوچ بچار سے کام لیں۔

واضح رہے کہ جارجیا میلونی نے دو سال قبل سارڈینیا کے ایک شخص کے خلاف ہتک عزت کا مقدمہ بھی دائر کیا تھا جس پر ان کا چہرہ استعمال کر کے ڈیپ فیک فحش تصاویر بنانے اور انہیں آن لائن پوسٹ کرنے کا الزام ہے۔ یہ قانونی کارروائی اب بھی جاری ہے۔