پاک فضائیہ نے معرکہ حق میں اپنی آپریشنل برتری اور صلاحیتوں کا لوہا منوایا: ایئر چیف

سربراہ پاک فضائیہ ایئر چیف مارشل ظہیر احمد بابر سدھو نے کہا ہے کہ معرکہ حق کے دوران پاک فضائیہ نے اپنی پیشہ ورانہ صلاحیتوں، عزم اور آپریشنل برتری کا بھرپور مظاہرہ کرتے ہوئے اپنی شاندار روایت کو برقرار رکھا ہے۔

اسلام آباد میں ایئر ہیڈکوارٹرز میں معرکہ حق کی پہلی سالگرہ کے موقع پر منعقدہ تقریب سے خطاب کرتے ہوئے ایئر چیف نے اس شاندار کامیابی کا سہرا قومی طاقت کے تمام عناصر کے متحد ہونے اور اللہ تعالیٰ کے فضل و کرم کے سر باندھا۔

انہوں نے کہا کہ پاک فضائیہ نے فضائی جنگ کی تاریخ میں پہلی بار مکمل سپیکٹرم اور کثیر جہتی آپریشن کامیابی سے مکمل کیا جس نے دنیا کو اپنی درستگی اور بے عیب مہارت سے متاثر کیا۔

ایئر چیف نے بتایا کہ ہماری فورسز نے متعدد اہم اور حساس اہداف کو نشانہ بنایا، دشمن کے مواصلاتی اور نقل و حمل کے نظام کو درہم برہم کیا، اہم تنصیبات کو ناکارہ بنایا، جدید ترین رافیل طیاروں کو مار گرایا اور ایس فور ہنڈریڈ سسٹم کو غیر مؤثر کر دیا۔ ان کا کہنا تھا کہ اس کارروائی کے نتیجے میں دشمن توقع سے کہیں زیادہ جلد گھٹنے ٹیکنے پر مجبور ہو گیا۔

ایئر چیف مارشل ظہیر احمد بابر سدھو کے مطابق اس کامیابی کی بنیاد پاک فضائیہ کا مقامی طور پر تیار کردہ کل چین سسٹم تھا جس نے تمام آپریشنل عناصر کو ایک مضبوط اور مربوط فورس پیکیج میں ڈھال دیا۔

انہوں نے واضح کیا کہ اگرچہ پاک فضائیہ مزید آگے بڑھنے کی بھرپور صلاحیت رکھتی تھی تاہم یہ آپریشنز مکمل ذمہ داری اور طاقت کے محتاط استعمال کے ساتھ کیے گئے۔

مستقبل کے حوالے سے بات کرتے ہوئے ایئر چیف نے کہا کہ پاک فضائیہ آئندہ کے چیلنجز سے نمٹنے کے لیے پوری طرح مستعد ہے۔ نیشنل ایرو اسپیس سائنس اینڈ ٹیکنالوجی پارک میں صلاحیتوں کو غیر معمولی رفتار سے بڑھایا جا رہا ہے اور کئی مقامی منصوبوں پر تیزی سے کام جاری ہے۔

انہوں نے اپنے عزم کا اعادہ کرتے ہوئے کہا کہ پاک فضائیہ ہمیشہ قوم کی توقعات پر پورا اترے گی اور پاکستان کے غیور عوام کے لیے فخر کا باعث بنی رہے گی۔