ڈی جی آئی ایس پی آر کی جانب سے قوم کو معرکہ حق کی پہلی سالگرہ پر مبارکباد

آئی ایس پی آر کے ڈائریکٹر جنرل لیفٹیننٹ جنرل احمد شریف چوہدری نے پاک بحریہ اور پاک فضائیہ کے اعلیٰ حکام کے ہمراہ معرکہ حق کی پہلی سالگرہ پر قوم کو مبارکباد پیش کی ہے۔ چھ اور سات مئی کی درمیانی شب منائی جانے والی اس سالگرہ کے موقع پر پاک فوج بالخصوص پاک فضائیہ نے ملکی عسکری تاریخ کے اس اہم باب کو فخر کے ساتھ یاد کیا ہے جس نے قومی اعتماد کو تقویت دی اور جدید تقاضوں کے مطابق صلاحیتوں میں اضافے کے عزم کا اعادہ کیا۔

ترجمان پاک فوج کے مطابق یہ تاریخی سنگ میل پاک فضائیہ کے جدید اور مستقبل کے تقاضوں سے ہم آہنگ فضائی قوت بننے کے سفر کی عکاسی کرتا ہے۔ جدید ترین سسٹمز کی شمولیت اور خلل انداز ٹیکنالوجیز کے فوری آپریشنل استعمال نے فضائیہ کی آپریشنل صلاحیتوں کو مزید مستحکم کیا ہے۔

آئی ایس پی آر کا کہنا ہے کہ پاک فضائیہ مستقبل کے کسی بھی ممکنہ جنگی منظرنامے کے لیے مکمل طور پر تیار ہے اور مادر وطن کے خلاف کسی بھی جارحیت کا بھرپور جواب دینے کی صلاحیت رکھتی ہے۔ دشمن کو خبردار کیا گیا ہے کہ پاکستان کے خلاف کسی بھی ناپاک عزائم کا جواب معرکہ حق سے بھی زیادہ قوت اور درستگی کے ساتھ دیا جائے گا۔

ملٹی ڈومین آپریشنز میں مہارت حاصل کرنے کے بعد پاک فضائیہ جدید فضائی جنگ کے بدلتے ہوئے تقاضوں کے مطابق ملکی خودمختاری اور علاقائی سالمیت کے تحفظ کے لیے تیار ہے۔ ان آپریشنز کی کامیاب تکمیل نے نہ صرف پاک فضائیہ کی پیشہ ورانہ مہارت کو ثابت کیا بلکہ قوم کے حوصلوں کو بھی تازہ کیا ہے۔

بیان میں مزید کہا گیا کہ پاکستان ایک امن پسند ملک ہے اور ہماری مسلح افواج ایک ذمہ دار اسٹریٹجک کلچر کی ترجمان ہیں۔ پاکستان کی تمام تر کوششیں خطے میں امن کے فروغ اور استحکام کے لیے وقف ہیں۔ پاکستان کے لیے امن کا مطلب عزت، وقار اور خودمختار مساوات کے ساتھ جینا ہے۔

پاکستانی مسلح افواج بدلتے ہوئے جیو پولیٹیکل اور علاقائی سیکیورٹی حالات سے بخوبی آگاہ ہیں۔ عالمی سطح پر تبدیل ہوتے ہوئے اسٹریٹجک ماحول کے باوجود وطن کے دفاع کے لیے افواجِ پاکستان کا عزم اور چوکسی غیر متزلزل ہے۔