وزیراعظم شہباز شریف کا دورہ گلگت بلتستان، ترقیاتی منصوبوں اور دانش اسکولوں کا افتتاح

وزیر اعظم شہباز شریف نے گلگت بلتستان کے دورے کے دوران مختلف ترقیاتی منصوبوں کا افتتاح اور سنگ بنیاد رکھا۔ اس موقع پر انہوں نے خطے میں شمسی توانائی کے منصوبوں کا اجرا کیا اور چار دانش اسکولوں کے قیام کا اعلان کرتے ہوئے میرٹ، تعلیم اور علاقائی امن کے فروغ پر زور دیا۔

وزیر اعظم نے گلگت اور اسکردو میں سیف سٹی منصوبوں کا افتتاح کیا اور خطے میں مفت سولر پینلز کی تقسیم کے توسیعی پروگرام کا آغاز کیا۔ انہوں نے گلگت میں 100 میگاواٹ کے سولر انرجی منصوبے کا سنگ بنیاد رکھتے ہوئے متعلقہ حکام کو ہدایت کی کہ اس منصوبے کو آئندہ سال کے وسط تک مکمل کیا جائے۔

طلبہ سے خطاب کرتے ہوئے وزیر اعظم شہباز شریف نے کہا کہ باصلاحیت طلبہ پاکستان کا فخر ہیں اور لیپ ٹاپ ان کی محنت اور قابلیت کا صلہ ہیں۔ انہوں نے واضح کیا کہ لیپ ٹاپ کی تقسیم کا عمل مکمل طور پر میرٹ پر مبنی تھا اور انہوں نے اپنے سیاسی کیریئر میں کبھی میرٹ پر سمجھوتہ نہیں کیا۔

دانش اسکولوں کے حوالے سے وزیر اعظم نے کہا کہ یہ اقدام پنجاب کے وزیر اعلیٰ کے طور پر ان کے دور میں معیاری تعلیم کے فروغ کے لیے شروع کیا گیا تھا۔ انہوں نے گلگت، گانچھے، استور اور اسکردو میں چار دانش اسکول قائم کرنے کا اعلان کیا، جہاں لڑکوں اور لڑکیوں کے لیے الگ الگ کیمپس ہوں گے اور تمام تر سہولیات مفت فراہم کی جائیں گی۔

وزیر اعظم نے اس عزم کا اعادہ کیا کہ وہ ملک بھر میں مساوی ترقی پر یقین رکھتے ہیں اور تمام صوبوں سمیت آزاد کشمیر اور گلگت بلتستان کی ترقی ہی پاکستان کی مجموعی ترقی کی ضمانت ہے۔

خطے میں امن کے حوالے سے بات کرتے ہوئے وزیر اعظم شہباز شریف نے کہا کہ پاکستان نے ایران اور امریکہ کے درمیان جنگ بندی اور ثالثی کے عمل میں موثر سیاسی اور عسکری کردار ادا کیا ہے۔ انہوں نے کہا کہ خطے میں امن کے لیے پاکستان کی کوششیں سنہری الفاظ میں یاد رکھی جائیں گی اور اس سلسلے میں اسحاق ڈار اور سید عاصم منیر کی خدمات کو ہمیشہ سراہا جائے گا۔