جنگ بندی کے بعد بیروت پر پہلا حملہ، اسرائیل کا حزب اللہ کمانڈر کو ہلاک کرنے کا دعویٰ

اسرائیلی فوج نے دعویٰ کیا ہے کہ بیروت کے جنوبی مضافات میں کیے گئے فضائی حملے کے نتیجے میں حزب اللہ کی ایلیٹ رضوان فورس کا ایک کمانڈر ہلاک ہو گیا ہے۔ گزشتہ ماہ طے پانے والی جنگ بندی کے بعد بیروت میں یہ اسرائیل کا پہلا حملہ ہے۔ حزب اللہ کی جانب سے تاحال اس ہلاکت کی تصدیق نہیں کی گئی ہے۔

اسرائیلی وزیراعظم بنجمن نیتن یاہو اور وزیر دفاع اسرائیل کاٹز نے ایک مشترکہ بیان میں اس کارروائی کا اعلان کیا۔ اس حملے نے اس جنگ بندی پر دباؤ بڑھا دیا ہے جس کے تحت بیروت پر اسرائیلی حملے رکے ہوئے تھے، تاہم اسرائیلی فوج بدستور دریائے لیتانی کے جنوبی علاقوں میں تعینات ہے اور جنوبی لبنان میں کارروائیاں جاری رکھے ہوئے ہے۔

ایران کے حمایت یافتہ گروپ حزب اللہ نے ان حملوں کے جواب میں اسرائیلی فوجیوں پر راکٹ اور مسلح ڈرون داغے ہیں۔ لبنان میں جنگ بندی وسیع تر ایرانی جنگ میں ایک اہم معاہدے کی بنیاد رہی ہے، کیونکہ اسرائیل کی جانب سے لبنان میں حملوں کا خاتمہ تہران اور واشنگٹن کے درمیان مذاکرات کا ایک اہم مطالبہ تھا۔

اسرائیل نے بدھ کے روز دریائے لیتانی کے شمال میں واقع متعدد دیہاتوں کے مکینوں کو انخلا کا حکم دیا ہے، جس سے خدشہ ظاہر کیا جا رہا ہے کہ اسرائیل اپنے آپریشن کے دائرہ کار کو وسیع کر رہا ہے۔ اس صورتحال کے باوجود دونوں ممالک کے درمیان سفیروں کی سطح پر بات چیت جاری ہے۔

لبنانی وزیراعظم نواف سلام کا کہنا ہے کہ اسرائیل اور لبنان کے درمیان اعلیٰ سطحی ملاقات کے بارے میں بات کرنا قبل از وقت ہوگا۔ انہوں نے کہا کہ واشنگٹن میں لبنانی اور اسرائیلی نمائندوں کے درمیان کسی بھی نئے مذاکرات کی بنیاد جنگ بندی کو مستحکم کرنا ہی ہوگی۔ حزب اللہ ان رابطوں کی شدید مخالفت کرتی ہے۔

لبنان کی وزارت صحت کے مطابق بدھ کے روز جنوبی لبنان کے قصبے زلایا میں اسرائیلی فضائی حملے میں دو خواتین اور ایک معمر شخص سمیت چار افراد ہلاک ہوئے۔ دوسری جانب اسرائیلی فوج نے بتایا کہ حزب اللہ کی جانب سے داغے گئے راکٹس اور ڈرون حملوں میں دو اسرائیلی فوجی زخمی ہوئے ہیں۔

وزارت صحت کے اعداد و شمار کے مطابق دو مارچ سے جاری اس جنگ میں اب تک لبنان میں 2700 سے زائد افراد لقمہ اجل بن چکے ہیں۔ اسرائیلی فوج کا کہنا ہے کہ حزب اللہ اب تک سینکڑوں راکٹ اور ڈرون فائر کر چکی ہے، جبکہ اس تنازع میں اب تک 17 اسرائیلی فوجی اور شمالی اسرائیل میں دو شہری ہلاک ہوئے ہیں۔