سابق قومی کھلاڑیوں کا پاک فوج کی قربانیوں کو شاندار خراجِ تحسین

بھارتی جارحیت کے خلاف پاک فوج کے آپریشن بنیان مرصوص کی پہلی سالگرہ کے موقع پر سابق قومی کھلاڑیوں نے مسلح افواج اور شہدا کو شاندار خراج تحسین پیش کیا ہے۔ سات مئی دو ہزار پچیس کو بھارتی اشتعال انگیزی کے جواب میں شروع کیے گئے اس آپریشن نے ملکی دفاع کو ناقابل تسخیر ثابت کیا۔

سابق کرکٹر توصیف احمد نے اپنے بیان میں کہا کہ پاکستان نے اس جنگ میں بھارت کو شکست دی اور آج پوری دنیا ہماری افواج کی صلاحیتوں کا اعتراف کر رہی ہے، یہاں تک کہ امریکہ جیسے ممالک بھی پاکستان کی تعریف کر رہے ہیں۔

سابق کرکٹر معین خان نے کہا کہ پوری قوم کو اپنی مسلح افواج اور معرکہ حق میں حصہ لینے والے غازیوں پر فخر ہے۔ انہوں نے کہا کہ قوم کا سر فخر سے بلند ہے۔

سابق اولمپین اصلاح الدین نے کہا کہ فیلڈ مارشل عاصم منیر کی قیادت میں پاکستان کا دفاع پہلے سے کہیں زیادہ مضبوط اور مستحکم ہو چکا ہے۔

راولپنڈی میں پریس کانفرنس سے خطاب کرتے ہوئے ڈپٹی چیف آف ایئر اسٹاف پروجیکٹس ایئر وائس مارشل طارق غازی نے انکشاف کیا کہ آپریشن بنیان مرصوص کے دوران پاک فضائیہ نے بھارت کے آٹھ طیارے مار گرائے۔ انہوں نے اس کامیابی کو بھارت کے خلاف آٹھ صفر کے اسکور سے تعبیر کیا۔