پنجاب میں سرکاری اسکولوں کے لیے موسم گرما کی تعطیلات 25 مئی سے متوقع

پنجاب بھر کے سرکاری اسکولوں میں موسم گرما کی تعطیلات کا آغاز پچیس مئی سے متوقع ہے۔ محکمہ اسکول ایجوکیشن پنجاب نے چھٹیوں کے لیے ابتدائی تاریخوں کو حتمی شکل دے دی ہے جس کی باضابطہ منظوری کے لیے معاملہ حکومت کو بھجوایا جائے گا۔

ذرائع کے مطابق موسم گرما کی یہ تعطیلات سولہ اگست تک جاری رہنے کا امکان ہے۔ اس حوالے سے ابتدائی خاکہ تیار کر لیا گیا ہے تاہم حتمی اعلان حکومت کی جانب سے کیا جائے گا۔

دوسری جانب صوبائی وزیر تعلیم رانا سکندر حیات نے واضح کیا ہے کہ موسم گرما کی تعطیلات کے بارے میں ابھی تک کوئی حتمی فیصلہ نہیں ہوا ہے۔ ان کا کہنا ہے کہ اس ضمن میں تین سے چار تجاویز زیر غور ہیں اور آئندہ چند روز میں حتمی لائحہ عمل طے کر لیا جائے گا۔