معرکہ حق کی پہلی سالگرہ: مسلح افواج کا ملکی دفاع کے عزم کا اعادہ

چیف آف آرمی اسٹاف اینڈ چیف آف ڈیفنس فورسز فیلڈ مارشل سید عاصم منیر، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے معرکہ حق کی پہلی سالگرہ کے موقع پر قوم اور مسلح افواج کے جوانوں کو مبارکباد پیش کی ہے۔ عسکری قیادت نے اسے قومی اتحاد، عسکری پیشہ ورانہ مہارت اور اسٹریٹجک عزم کی علامت قرار دیا ہے۔

اس موقع پر جاری کردہ خصوصی پیغام میں فوجی قیادت کا کہنا ہے کہ یہ دن شہداء اور غازیوں کی قربانیوں کو خراج تحسین پیش کرنے کے لیے گہرے احترام اور قومی جوش و جذبے کے ساتھ منایا جا رہا ہے۔ ملک بھر میں منعقدہ تقریبات میں یادگار شہداء پر پھول چڑھائے گئے اور وطن کے دفاع کے لیے جانوں کا نذرانہ پیش کرنے والوں کے درجات کی بلندی کے لیے خصوصی دعائیں کی گئیں۔

اعلامیے کے مطابق معرکہ حق پاکستان کی تاریخ میں ایک فیصلہ کن سنگ میل کی حیثیت رکھتا ہے جو ملکی عزم، عسکری صلاحیت اور اسٹریٹجک پختگی کا عکاس ہے۔ عسکری قیادت نے واضح کیا کہ اس تنازع کے دوران پاکستان کے ردعمل نے دشمن کی سازشوں، جھوٹے بیانیوں اور بین الاقوامی سطح پر پھیلائی گئی غلط معلومات کی مہم کو بے نقاب کر دیا ہے۔

فوجی قیادت نے مزید کہا کہ روایتی اور ہائبرڈ خطرات بشمول پراکسی دہشت گردی کے باوجود مسلح افواج نے زمین، فضا، سمندر، سائبر اور انفارمیشن کے محاذوں پر اپنی آپریشنل صلاحیتوں کا لوہا منوایا ہے۔ معرکہ حق کے بعد پاکستان کی دفاعی تیاری اور کل وقتی ڈیٹرنس مزید مستحکم ہوئی ہے، جبکہ محدود وسائل کے باوجود دفاعی نظام کو مضبوط تر بنایا گیا ہے۔

عسکری قیادت نے خطے میں امن و استحکام کے لیے پاکستان کے عزم کا اعادہ کرتے ہوئے کہا کہ جنوبی ایشیا میں پائیدار امن بامعنی مذاکرات، باہمی احترام اور بین الاقوامی قوانین کی پاسداری سے ہی ممکن ہے۔ بیان میں مزید کہا گیا کہ مسلح افواج قوم کی مکمل حمایت کے ساتھ ملک کی سلامتی، استحکام اور ارضی سالمیت کے تحفظ کے لیے ہر قسم کے اندرونی اور بیرونی چیلنجز کا مقابلہ کرنے کے لیے ہمہ وقت تیار اور مستعد ہیں۔