عسکری قیادت کی جانب سے معرکہ حق کی پہلی سالگرہ پر قوم کو مبارکباد

راولپنڈی میں عسکری قیادت نے معرکہ حق کی پہلی سالگرہ کے موقع پر قوم اور مسلح افواج کو مبارکباد پیش کرتے ہوئے شہدا کو خراج تحسین پیش کیا ہے۔ اس موقع پر جاری کردہ مشترکہ بیان میں چیف آف آرمی اسٹاف جنرل سید عاصم منیر، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے اس دن کو ہمت، اتحاد اور قومی عزم کی علامت قرار دیا ہے۔

عسکری قیادت کا کہنا ہے کہ معرکہ حق کی سالگرہ انتہائی احترام اور قومی جوش و جذبے کے ساتھ منائی جا رہی ہے جو دفاعی اداروں اور عوام کی پیشہ ورانہ مہارت اور قربانیوں کا عکاس ہے۔ بیان میں اس بات پر زور دیا گیا کہ مسلح افواج قوم کے ساتھ کندھے سے کندھا ملا کر کھڑی ہیں اور یہ اٹوٹ رشتہ پاکستان کی خودمختاری اور استحکام کی بنیاد ہے۔

اس اہم دن کی مناسبت سے ملک بھر میں تقریبات کا انعقاد کیا جا رہا ہے جس میں شہدا کی یادگاروں پر پھول چڑھائے جا رہے ہیں اور وطن کے دفاع کے لیے جان قربان کرنے والے جوانوں کے درجات کی بلندی کے لیے خصوصی دعائیں کی جا رہی ہیں۔ جی ایچ کیو میں بھی ایک مرکزی تقریب کا اہتمام کیا گیا ہے۔

فوجی قیادت کے مطابق معرکہ حق پاکستان کے قومی سفر میں ایک سنگ میل کی حیثیت رکھتا ہے جس نے ملک کی تزویراتی پختگی اور اجتماعی عزم کو اجاگر کیا۔ اس کامیابی نے قومی اعتماد کو مضبوط کیا اور خطے میں پاکستان کی حیثیت کو ایک ذمہ دار اور ناقابل تسخیر قوت کے طور پر مستحکم کیا ہے۔

بیان میں مزید کہا گیا کہ پاکستان نے روایتی اور ہائبرڈ خطرات بشمول پراکسی دہشت گردی اور غلط بیانی کی مہمات کے خلاف اپنی آپریشنل صلاحیتوں کا لوہا منوایا ہے۔ عسکری حکام نے واضح کیا کہ پاکستان خطے میں پائیدار امن کے قیام کے لیے پرعزم ہے تاہم اس کا حصول با معنی مذاکرات اور بین الاقوامی قوانین کی پاسداری سے ہی ممکن ہے۔

آخر میں عسکری قیادت نے اس عزم کا اعادہ کیا کہ متحد قوم کی پشت پناہی کے ساتھ مسلح افواج کسی بھی داخلی اور خارجی چیلنج سے نمٹنے کے لیے مکمل طور پر تیار ہیں اور ملک کی جغرافیائی سالمیت کا ہر قیمت پر تحفظ کیا جائے گا۔