حکومت کی ترجیحی شعبوں کے لیے خصوصی مراعات دینے پر غور

وفاقی وزیر برائے اقتصادی امور احد چیمہ کی زیر صدارت ایک اعلیٰ سطحی اجلاس منعقد ہوا جس میں آئندہ وفاقی بجٹ کے لیے برآمدات کے فروغ کی اسکیموں اور پالیسی آپشنز کا تفصیلی جائزہ لیا گیا۔ اجلاس کا بنیادی مقصد ملکی برآمدات کو مستحکم کرنا اور ترجیحی شعبوں کے لیے مؤثر اور ہدف پر مبنی مراعات فراہم کرنا ہے۔

اجلاس کے شرکاء نے وفاقی وزیر کو آئندہ بجٹ کے لیے زیر غور برآمدی پالیسی کی تجاویز پر بریفنگ دی۔ اس موقع پر برآمدی شعبوں کی ترقی، مسابقت میں بہتری، برآمدات میں چھوٹے اور درمیانے درجے کی صنعتوں کی شمولیت بڑھانے اور عالمی منڈیوں میں پاکستان کی موجودگی کو وسعت دینے کے لیے پالیسی فریم ورک تشکیل دینے پر تفصیلی تبادلہ خیال کیا گیا۔

اجلاس میں مالیاتی معاونت، تجارتی سہولت کاری اور شعبہ وار مراعات سے متعلق مختلف تجاویز کا جائزہ لیا گیا۔ حکام نے اس بات پر زور دیا کہ برآمدات میں اضافے کے لیے صرف ٹیکسوں میں کمی کافی نہیں بلکہ پیداواری عوامل، انفراسٹرکچر، سہولت کاری کے اقدامات اور کاروبار میں آسانی کا عمل کلیدی کردار ادا کرے گا۔

وفاقی وزیر احد چیمہ نے اس عزم کا اظہار کیا کہ ایک ایسا پائیدار اور کارکردگی پر مبنی برآمدی مراعاتی فریم ورک وضع کیا جائے گا جو برآمدی حجم میں اضافے اور ویلیو ایڈیشن کو فروغ دے سکے۔