صوبوں کا این ایف سی ایوارڈ میں حصہ کم نہیں کیا جا سکتا، نثار کھوڑو

پاکستان پیپلز پارٹی سندھ کے صدر نثار کھوڑو نے کہا ہے کہ این ایف سی ایوارڈ کو آئینی تحفظ حاصل ہے اور آئین کے تحت صوبوں کا حصہ بڑھایا تو جا سکتا ہے لیکن اسے کم کرنے کی گنجائش موجود نہیں ہے۔ حیدرآباد میں پریس کانفرنس سے خطاب کرتے ہوئے انہوں نے مطالبہ کیا کہ ہر پانچ سال بعد نیا این ایف سی ایوارڈ جاری ہونا چاہیے، تاہم افسوسناک امر یہ ہے کہ 2008 کے بعد سے اب تک کوئی نیا ایوارڈ جاری نہیں کیا گیا اور نہ ہی این ایف سی کمیشن کا اجلاس طلب کیا گیا ہے۔

نثار کھوڑو نے واضح کیا کہ این ایف سی کمیشن میں صوبوں کا حصہ کم کر کے وفاق کا حصہ بڑھانے کا کوئی تصور موجود نہیں ہے۔ انہوں نے کہا کہ فاٹا اور گلگت بلتستان کو این ایف سی ایوارڈ میں حصہ دینے کے حوالے سے صوبوں کا موقف کمیشن کے فورم پر ہی طے کیا جائے گا۔

آئینی ترامیم کے حوالے سے گفتگو کرتے ہوئے انہوں نے کہا کہ میڈیا میں 28 ویں ترمیم کا تذکرہ ہے لیکن اس کا کوئی مسودہ سامنے نہیں آیا۔ انہوں نے تنبیہ کی کہ آئین میں ترامیم کی جا سکتی ہیں لیکن یہ کوئی مذاق نہیں کہ ہر 15 دن بعد آئین میں تبدیلی کی جائے۔ انہوں نے یہ بھی کہا کہ پارلیمنٹ میں بے نظیر انکم سپورٹ پروگرام کو وفاق سے صوبوں کو منتقل کرنے کے حوالے سے بحث ہو سکتی ہے۔

پیپلز پارٹی کے رہنما نے پیٹرول کی قیمتوں میں اضافے پر تشویش کا اظہار کرتے ہوئے کہا کہ اس اقدام سے غریب عوام براہ راست متاثر ہوں گے اور حکومت کی جانب سے دیا جانے والا ریلیف ناکافی ہے۔

ملک کی مجموعی صورتحال پر بات کرتے ہوئے نثار کھوڑو نے کہا کہ آئی ایس پی آر واضح کر چکا ہے کہ فیصلے سیاسی قیادت کرتی ہے۔ انہوں نے نو مئی کے واقعات کا ذکر کرتے ہوئے کہا کہ اس روز دو حملے ہوئے، ایک حملہ پاکستان کے اندر ایک سیاسی جماعت نے ریاست کے خلاف کیا، جبکہ دوسرا حملہ بھارت کی طرف سے کیا گیا جس کا پاکستان نے بھرپور جواب دیا اور ہر محاذ پر کامیابی حاصل کی۔