معرکہ حق کی پہلی سالگرہ: پاک فوج کے ہیروز کو خراجِ تحسین پیش کرنے کے لیے خصوصی ترانہ جاری

لاہور (نمائندہ خصوصی) معرکہ حق میں فتح کو ایک سال مکمل ہونے پر دنیا میڈیا گروپ نے پاک فوج کے غازیوں اور بہادر سپوتوں کو شاندار الفاظ میں خراج تحسین پیش کیا ہے۔ اس موقع پر حب الوطنی کے جذبے کو اجاگر کرنے کے لیے ایک خصوصی ملی نغمہ بھی جاری کیا گیا ہے۔

آٹھ مئی 2025 کو بھارت کی جانب سے مسلط کردہ جنگ کا پاکستان نے بھرپور جواب دیا۔ بھارت نے آپریشن سندور کے نام سے جارحیت کا آغاز کیا تو پاک فوج نے آپریشن بنیان مرصوص کے ذریعے دشمن کے عزائم خاک میں ملا دیے۔ اس جوابی کارروائی نے بھارت کا غرور پاش پاش کر دیا اور نریندر مودی کے جنگی جنون کو ہمیشہ کے لیے ختم کر دیا۔

چیف آف ڈیفنس فورسز فیلڈ مارشل سید عاصم منیر کی دانشمندانہ اور ولولہ انگیز قیادت میں پاک فوج نے ہر محاذ پر شاندار کارکردگی کا مظاہرہ کیا۔ یہ محض ہتھیاروں کی جنگ نہیں تھی بلکہ سچائی اور انصاف کی ایسی فتح تھی جس نے پوری دنیا کو حیران کر دیا۔

معرکہ حق ملکی دفاع کی تاریخ میں ایک درخشاں باب کے طور پر ہمیشہ یاد رکھا جائے گا اور آنے والی نسلوں کے لیے مشعل راہ ثابت ہوگا۔ یہ آپریشن قومی عزم، عسکری مہارت اور اسٹریٹجک پختگی کی ایک ایسی مثال ہے جس پر پوری قوم کو فخر ہے۔ آج پوری قوم اس تاریخی فتح کا جشن منا رہی ہے جس نے دشمن کو منہ کی کھانے پر مجبور کر دیا۔