آئی سی سی ون ڈے رینکنگ: پاکستان ایک درجہ تنزلی کے بعد پانچویں نمبر پر پہنچ گیا

انٹرنیشنل کرکٹ کونسل نے مینز ون ڈے انٹرنیشنل ٹیموں کی سالانہ درجہ بندی جاری کر دی ہے جس کے مطابق پاکستان ایک درجہ تنزلی کے بعد پانچویں نمبر پر آ گیا ہے۔ جنوبی افریقہ نے پاکستان کو پیچھے چھوڑتے ہوئے چوتھی پوزیشن حاصل کر لی ہے۔

تازہ ترین درجہ بندی میں بھارت 118 پوائنٹس کے ساتھ بدستور پہلے نمبر پر براجمان ہے، اگرچہ اسے سالانہ نظرثانی کے دوران ایک پوائنٹ کا نقصان ہوا ہے۔ نیوزی لینڈ 113 پوائنٹس کے ساتھ دوسرے اور آسٹریلیا 109 پوائنٹس کے ساتھ تیسرے نمبر پر موجود ہے۔

جنوبی افریقہ 102 پوائنٹس کے ساتھ چوتھے نمبر پر آ گیا ہے جبکہ پاکستان 98 پوائنٹس کے ساتھ پانچویں پوزیشن پر ہے۔ درجہ بندی میں سری لنکا 96 پوائنٹس کے ساتھ چھٹے، افغانستان 93 پوائنٹس کے ساتھ ساتویں اور انگلینڈ 89 پوائنٹس کے ساتھ آٹھویں نمبر پر ہے۔

بنگلہ دیش 84 پوائنٹس کے ساتھ نویں اور ویسٹ انڈیز 74 پوائنٹس کے ساتھ دسویں نمبر پر موجود ہے۔ آئی سی سی کے مطابق سالانہ اپ ڈیٹ کے بعد بنگلہ دیش اور ویسٹ انڈیز کے درمیان پوائنٹس کا فرق 6 سے بڑھ کر 10 ہو گیا ہے۔

آئی سی سی کا کہنا ہے کہ یہ درجہ بندی 2027 کے ون ڈے ورلڈ کپ کے کوالیفکیشن کے حوالے سے انتہائی اہمیت کی حامل ہے۔ اہلیت کے معیار کے مطابق 31 مارچ 2027 تک آئی سی سی رینکنگ میں شامل ٹاپ آٹھ ٹیمیں، میزبان جنوبی افریقہ اور زمبابوے کے ہمراہ براہ راست ٹورنامنٹ کے لیے کوالیفائی کریں گی۔

دیگر ٹیموں کی کارکردگی پر نظر ڈالی جائے تو آئرلینڈ 54 پوائنٹس کے ساتھ زمبابوے کو پیچھے چھوڑ کر گیارہویں نمبر پر آ گیا ہے۔ امریکہ نے بھی بہتری دکھاتے ہوئے سکاٹ لینڈ کو پیچھے چھوڑ کر 46 پوائنٹس کے ساتھ تیرہویں پوزیشن حاصل کر لی ہے۔ جبکہ متحدہ عرب امارات کینیڈا سے آگے نکل کر انیسویں نمبر پر پہنچ گیا ہے۔