لاہور ہائی کورٹ نے چوہدری شوگر ملز کیس میں وزیراعلیٰ پنجاب مریم نواز کی جانب سے بطور ضمانت جمع کرائی گئی 7 کروڑ روپے کی رقم واپس کرنے کا حکم دے دیا ہے۔ یہ حکم قومی احتساب بیورو کی جانب سے کیس کی کارروائی واپس لینے کے بعد سامنے آیا ہے۔
چیف جسٹس عالیہ نیلم کی سربراہی میں تین رکنی بینچ نے اس درخواست پر سماعت کی۔ دوران سماعت نیب کے وکیل نے ایک حلف نامہ عدالت میں جمع کرایا جس میں اس بات کی تصدیق کی گئی کہ بیورو نے مذکورہ کیس میں آئینی کارروائی واپس لے لی ہے۔ عدالت نے نیب کی جانب سے بیان جمع کرائے جانے کے بعد مریم نواز کی استدعا منظور کرتے ہوئے رقم کی واپسی کا حکم جاری کر دیا۔
درخواست میں موقف اختیار کیا گیا تھا کہ یہ رقم شوگر ملز ریفرنس کے دوران ضمانت کے طور پر جمع کرائی گئی تھی۔ چونکہ نیب اب اس کیس کو بند کر چکا ہے لہذا جمع شدہ رقم واپس کی جائے۔
عدالتی کارروائی کے بعد میڈیا سے گفتگو کرتے ہوئے مریم نواز کے وکیل جاوید ارشد نے کہا کہ عدالت نے درخواست منظور کر لی ہے اور تحریری حکم نامہ جاری ہونے کے بعد کیپٹن ریٹائرڈ صفدر اعوان یہ رقم وصول کریں گے۔ انہوں نے مزید کہا کہ یہ درخواست نیب کی جانب سے باضابطہ طور پر کیس ختم کیے جانے کے بعد دائر کی گئی تھی۔
یاد رہے کہ ایک ہفتہ قبل لاہور ہائی کورٹ کے ایک ڈویژن بینچ نے چوہدری شوگر ملز کیس میں مریم نواز کی ضمانت منسوخ کرانے کے لیے نیب کی درخواست کو غیر مؤثر قرار دے کر نمٹا دیا تھا۔ نیب پراسیکیوٹر نے عدالت کو آگاہ کیا تھا کہ وزیراعلیٰ پنجاب اس کیس میں بری ہو چکی ہیں جس کے بعد ضمانت منسوخی کی درخواست کا کوئی جواز نہیں رہا۔
لاہور ہائی کورٹ نے 4 نومبر 2019 کو مریم نواز کو چوہدری شوگر ملز کیس میں ضمانت پر رہا کیا تھا اور انہیں پاسپورٹ عدالت میں جمع کرانے کے ساتھ ساتھ 7 کروڑ روپے کی رقم بطور زر ضمانت عدالتی رجسٹرار کے پاس جمع کرانے کا حکم دیا تھا۔ بعد ازاں 3 اکتوبر 2022 کو ایک فل بینچ نے نیب کی جانب سے پاسپورٹ کی مزید ضرورت نہ ہونے کے بیان کے بعد مریم نواز کو ان کا پاسپورٹ واپس کر دیا تھا۔
واضح رہے کہ نیب کی ٹیم نے مریم نواز کو 8 اگست 2019 کو اس وقت گرفتار کیا تھا جب وہ کوٹ لکھپت جیل میں اپنے والد نواز شریف سے ملاقات کے لیے موجود تھیں۔
صدر ڈونلڈ ٹرمپ کے بیجنگ کے دورے اور چینی صدر شی جن پنگ کے ساتھ…
اسلام آباد میں پاکستان تحریک انصاف کے بانی چیئرمین سے ملاقات کے لیے چھ رکنی…
اقوام متحدہ کے سابق ہتھیاروں کے معائنہ کار اور امریکی میرین کور کے انٹیلی جنس…
وزیراعظم شہباز شریف کی جانب سے گلگت بلتستان کے دورے کے دوران خطے میں چار…
کراچی میں پانی کی چوری کی روک تھام کے لیے قائم خصوصی تھانہ خود سنگین…
امریکی صدر ڈونلڈ ٹرمپ چین کے دورے پر پہنچ گئے ہیں، ان کے ہمراہ امریکہ…