امریکہ ایران کشیدگی ختم ہوتے ہی مہنگائی میں کمی آئے گی، خواجہ آصف

وفاقی وزیر دفاع خواجہ محمد آصف نے کہا ہے کہ پاکستان میں حالات کی بہتری اور مہنگائی میں کمی کا انحصار امریکہ اور ایران کے درمیان جاری کشیدگی کے خاتمے پر ہے۔ اسلام آباد میں میڈیا سے گفتگو کرتے ہوئے انہوں نے عوام کو یقین دلایا کہ موجودہ مشکل حالات کے بوجھ کو کسی نہ کسی طرح برداشت کرنا ہوگا۔

وزیر دفاع نے کہا کہ پیٹرولیم مصنوعات کی قیمتوں میں اضافے سے غریب طبقے پر اضافی بوجھ پڑا ہے تاہم یہ اضافہ عالمی اور علاقائی سطح پر پیٹرولیم مصنوعات کی قیمتیں بڑھنے کے باعث ہوا ہے۔ انہوں نے اس امید کا اظہار کیا کہ امریکہ اور ایران کے مابین جاری تنازع کا جلد کوئی مستقل حل نکل آئے گا۔

خواجہ آصف نے مزید کہا کہ جیسے ہی اس کشیدگی کا خاتمہ ہوگا تو پیٹرولیم مصنوعات کی قیمتیں معمول پر آ جائیں گی۔ انہوں نے دعا کی کہ امریکہ اور ایران کے درمیان جاری جنگ جیسی صورتحال کا جلد از جلد پرامن حل تلاش کر لیا جائے۔