ٹینس لیجنڈ بیورن بورگ کا دورہ پاکستان ملتوی

پاکستان ٹینس فیڈریشن نے اعلان کیا ہے کہ ٹینس کی دنیا کے لیجنڈ اور سابق عالمی نمبر ایک کھلاڑی بیورن بورگ کا دورہ پاکستان ملتوی کر دیا گیا ہے۔ فیڈریشن کے مطابق بیورن بورگ کو ہنگامی ذاتی مصروفیات کے باعث فوری طور پر کہیں اور جانا پڑ گیا ہے جس کی وجہ سے وہ اس وقت پاکستان کا سفر کرنے سے قاصر ہیں۔ پاکستان ٹینس فیڈریشن نے ان کی مجبوری کو سمجھتے ہوئے صورتحال کا احترام کرنے کا اظہار کیا ہے۔

اس تبدیلی کے باوجود جاری ٹورنامنٹ اور طے شدہ ایونٹس اپنے پورے جوش و خروش کے ساتھ جاری رہیں گے۔ پاکستانی کھلاڑیوں نے ایونٹ میں شاندار کارکردگی کا مظاہرہ کیا ہے اور قومی کھلاڑیوں نے ڈبلز ایونٹ کا ٹائٹل اپنے نام کر کے ملک کا نام روشن کیا ہے۔

ٹورنامنٹ کی رونقوں میں اضافہ اس وقت ہوا جب پاکستان کے ابھرتے ہوئے اسٹار محمد شعیب نے سنگلز فائنل کے لیے کوالیفائی کر لیا۔ یہ کارنامہ بیس سال کے طویل وقفے کے بعد کسی پاکستانی کھلاڑی کی جانب سے آئی ٹی ایف فیوچرز ایونٹ میں سنگلز فائنل تک رسائی کی ایک بڑی کامیابی ہے۔

پاکستان ٹینس فیڈریشن نے ٹینس کے شائقین سے اپیل کی ہے کہ وہ بڑی تعداد میں اسٹیڈیم کا رخ کریں اور اپنے کھلاڑیوں کی حوصلہ افزائی کریں جو اپنی غیر معمولی کارکردگی سے ملک کا وقار بلند کر رہے ہیں۔