بالائی علاقوں میں بارش اور آندھی کا امکان، سندھ اور بلوچستان میں ہیٹ ویو برقرار

محکمہ موسمیات نے پیش گوئی کی ہے کہ اگلے چوبیس گھنٹوں کے دوران ملک کے بیشتر علاقوں میں موسم گرم اور خشک رہے گا، تاہم سندھ اور جنوبی بلوچستان کے اضلاع میں شدید گرمی کا سلسلہ جاری رہنے کا امکان ہے۔

محکمہ موسمیات کے مطابق بالائی پنجاب، بالائی خیبر پختونخوا، گلگت بلتستان، کشمیر اور خطہ پوٹھوہار میں مطلع ابر آلود رہنے کے ساتھ ساتھ تیز ہواؤں، گرد آلود طوفان اور گرج چمک کے ساتھ بارش کی توقع ہے۔ اس دوران بعض مقامات پر درمیانی سے موسلا دھار بارش اور ژالہ باری بھی ہو سکتی ہے۔

وفاقی دارالحکومت اسلام آباد اور گردونواح میں مطلع جزوی طور پر ابر آلود رہے گا جبکہ تیز ہواؤں اور گرج چمک کے ساتھ بارش کا امکان ہے۔

خیبر پختونخوا کے اضلاع دیر، چترال، ملاکنڈ، کوہستان، بونیر، پشاور، مردان، نوشہرہ، سوات، مالم جبہ، کالام، مہمند، کرم، پارا چنار، ایبٹ آباد، ہری پور، مانسہرہ، صوابی، چارسدہ اور باجوڑ میں بادل چھائے رہنے اور بارش کی توقع ہے۔ کرک، بنوں، لکی مروت، ڈیرہ اسماعیل خان اور وزیرستان کے چند مقامات پر بھی بارش متوقع ہے۔

پنجاب میں مری، گلیات، راولپنڈی، اٹک، چکوال، جہلم، فیصل آباد، لاہور، قصور، گوجرانوالہ، گجرات، منڈی بہاؤالدین، حافظ آباد، سرگودھا، سیالکوٹ، نارووال، خوشاب، نور پور تھل اور میانوالی میں چند مقامات پر تیز ہواؤں اور گرج چمک کے ساتھ بارش اور ژالہ باری کا امکان ظاہر کیا گیا ہے۔

کشمیر اور گلگت بلتستان میں مطلع ابر آلود رہے گا اور چند مقامات پر تیز ہواؤں اور گرج چمک کے ساتھ بارش ہوگی، جبکہ کشمیر کے کچھ حصوں میں تیز بارش اور ژالہ باری بھی متوقع ہے۔