ملک میں 28 ویں آئینی ترمیم کی بازگشت، سیاسی حلقوں میں مشاورت کا عمل تیز

اسلام آباد میں اٹھائیسویں آئینی ترمیم کے حوالے سے سیاسی اور سرکاری حلقوں میں سرگرمیاں تیز ہو گئی ہیں اور امکان ظاہر کیا جا رہا ہے کہ مئی کا آئندہ ہفتہ قانون سازی کے عمل میں فیصلہ کن ثابت ہوگا۔ ملکی ایوانوں اور اہم ریاستی اداروں میں اس مجوزہ ترمیم پر مشاورت کا عمل جاری ہے جس کے پیش نظر قانون سازوں کو اسلام آباد میں موجود رہنے کی ہدایت کی گئی ہے۔

ذرائع کے مطابق صدر مملکت اور وزیراعظم شہباز شریف کے درمیان ہونے والی حالیہ ملاقات میں بھی اس آئینی ترمیم پر تفصیلی تبادلہ خیال کیا گیا۔ اجلاس میں قومی اسمبلی کے اسپیکر ایاز صادق سمیت دیگر اعلیٰ حکام نے بھی شرکت کی۔ اسپیکر قومی اسمبلی کو وفاقی حکومت کے اہم اتحادیوں بالخصوص مسلم لیگ ن اور پاکستان پیپلز پارٹی کے درمیان اتفاق رائے پیدا کرنے کی ذمہ داری سونپی گئی ہے۔

پاکستان پیپلز پارٹی کی جانب سے مجوزہ ترمیم کے کچھ اہم پہلوؤں پر تحفظات کا اظہار کیا گیا ہے۔ ان خدشات کو دور کرنے کے لیے وزیراعظم شہباز شریف، اسپیکر ایاز صادق اور وفاقی وزیر رانا ثناء اللہ مذاکرات میں مصروف ہیں جبکہ نائب وزیراعظم اسحاق ڈار بھی اس عمل میں کلیدی کردار ادا کر رہے ہیں۔ پیپلز پارٹی کا اعتماد حاصل کرنے کے لیے سندھ میں ترقیاتی منصوبوں کو بجٹ میں شامل کرنے کی تجاویز بھی زیر غور ہیں۔

ایوان صدر میں ہونے والی ایک مشاورتی نشست میں چیئرمین پیپلز پارٹی بلاول بھٹو زرداری اور دیگر رہنماؤں کو وزارت خزانہ کی جانب سے این ایف سی ایوارڈ اور وفاق و صوبوں کے درمیان مالی وسائل کی تقسیم کے امور پر بریفنگ دی گئی۔

ذرائع کا کہنا ہے کہ حکومت 21 مئی تک وسیع تر سیاسی اتفاق رائے کے ساتھ یہ ترمیم لانے پر غور کر رہی ہے۔ مجوزہ ترامیم میں این ایف سی ایوارڈ اور گورننس سے متعلق امور شامل ہیں، تاہم موجودہ مسودے میں نئے صوبوں کے قیام کا معاملہ شامل نہیں ہے۔ حکومتی سطح پر مشاورت کا عمل جاری ہے تاکہ پارلیمان سے اس قانون سازی کو باآسانی منظوری دلائی جا سکے۔