ایوانِ صدر میں پروقار تقریب: صدر آصف علی زرداری نے نمایاں شخصیات کو سول اعزازات سے نوازا

اسلام آباد میں ایوان صدر کے اندر منعقدہ ایک پروقار تقریب میں صدر مملکت آصف علی زرداری نے ملک کے مختلف شعبوں میں نمایاں خدمات انجام دینے والی شخصیات کو اعلیٰ ترین سول اعزازات سے نوازا۔ تقریب میں وفاقی وزراء، اعلیٰ حکام، سفارت کاروں اور ایوارڈ یافتگان کے اہل خانہ نے شرکت کی۔

وفاقی وزیر اویس لغاری کو توانائی کے شعبے میں اصلاحات اور اہم اقدامات پر ہلال امتیاز سے نوازا گیا۔ اسی شعبے میں خدمات کے اعتراف میں مشیر نجکاری محمد علی کو بھی ہلال امتیاز دیا گیا۔ کھیلوں کے میدان میں شاندار خدمات پر سابق کرکٹ کپتان شاہد آفریدی کو ہلال امتیاز سے سرفراز کیا گیا۔ نامور کوہ پیما شہروز کاشف کے لیے ہلال امتیاز ان کی والدہ نے وصول کیا۔

ادب اور جمہوریت کے لیے طویل جدوجہد کرنے والوں کو بھی خراج تحسین پیش کیا گیا۔ ممتاز سیاستدان نوابزادہ نصراللہ خان کو جمہوریت کے لیے گراں قدر خدمات پر بعد از مرگ نشان امتیاز سے نوازا گیا۔ معروف لکھاری اور براڈکاسٹر عطا الحق قاسمی کو ادب کے شعبے میں خدمات پر نشان امتیاز دیا گیا۔ سینیٹر اور کالم نگار عرفان صدیقی کو بھی ادب اور عوامی امور میں خدمات کے اعتراف میں نشان امتیاز سے نوازا گیا۔ ادیب اور ڈرامہ نگار اصغر ندیم سید کو ادب میں خدمات پر ہلال امتیاز دیا گیا۔

تقریب کے دوران مسلح افواج اور پولیس کے بہادر جوانوں کی قربانیوں کو بھی سراہا گیا۔ سپاہی اظہر محمود کو غیر معمولی بہادری پر ہلال شجاعت سے نوازا گیا۔ سپاہی شاہ ولی خان کو ملک کے دفاع میں جان کا نذرانہ پیش کرنے پر بعد از مرگ ہلال شجاعت دیا گیا۔

پولیس لائنز بنوں پر حملے کے دوران دہشت گردوں کا راستہ روکنے والے کانسٹیبل حفیظ اللہ کو بہادری پر ہلال شجاعت سے نوازا گیا۔ اس کے علاوہ فرائض کی ادائیگی کے دوران جام شہادت نوش کرنے والے اسسٹنٹ سب انسپکٹر اعجاز خان اور کانسٹیبل عالم زیب کو بھی بعد از مرگ ہلال شجاعت سے نوازا گیا۔