پاکستان نے امریکا کی جانب سے ایران کو اہم تجاویز پہنچا دیں

پاکستان نے تہران کو امریکہ کی جانب سے موصول ہونے والی ایک تجاویز کی دستاویز پہنچا دی ہے۔ خبر رساں ادارے رائٹرز کے مطابق ایک اعلیٰ ایرانی ذریعے نے بدھ کے روز اس پیش رفت کی تصدیق کی ہے، تاہم تہران اور واشنگٹن کے مابین جنگ بندی کے لیے مذاکرات کی جگہ کا تعین تاحال نہیں ہو سکا۔

حساس نوعیت کے باعث نام ظاہر نہ کرنے کی شرط پر بات کرتے ہوئے ایرانی ذریعے نے اس تجویز کی تفصیلات بتانے سے گریز کیا اور یہ واضح نہیں کیا کہ آیا یہ وہی 15 نکاتی امریکی فریم ورک ہے جس کا میڈیا میں تذکرہ کیا جا رہا ہے۔

ذرائع کا مزید کہنا ہے کہ ترکی بھی جنگ کے خاتمے کے لیے راستہ تلاش کرنے میں مدد کر رہا ہے۔ مذاکرات کے مقام کے حوالے سے ترکی یا پاکستان میں سے کسی ایک ملک پر غور کیا جا رہا ہے۔

خطے میں کشیدگی کا آغاز 28 فروری کو امریکہ اور اسرائیل کی جانب سے ایران پر کیے گئے نام نہاد پیشگی حملے کے بعد ہوا، جس کے بعد دونوں ممالک کے مابین براہ راست عسکری تصادم نے گزشتہ برسوں کی سب سے خطرناک صورتحال اختیار کر لی ہے۔

اس کشیدگی میں اس وقت مزید شدت آئی جب ایرانی قیادت کو نشانیاں بنایا گیا، جس میں سپریم لیڈر آیت اللہ علی خامنہ ای کی ہلاکت کی اطلاعات بھی شامل ہیں، جس نے وسیع تر علاقائی جنگ کے خدشات کو دوچند کر دیا ہے۔

موجودہ تنازع کے دوران میزائل اور ڈرون حملوں کا سلسلہ جاری ہے، جس میں ایرانی کارروائیوں نے امریکی تنصیبات اور اثاثوں کو ہدف بنایا ہے۔ اس صورتحال میں واشنگٹن نے اپنی عسکری موجودگی بڑھا دی ہے جبکہ تہران نے مزاحمت کے ساتھ ساتھ مذاکرات کے لیے مشروط آمادگی کا اظہار بھی کیا ہے۔

اگرچہ تاحال کسی جنگ بندی تک رسائی ممکن نہیں ہو سکی، تاہم سفارتی کوششیں تیز کر دی گئی ہیں۔ عالمی برادری کو خدشہ ہے کہ یہ طویل تنازع توانائی کی عالمی منڈیوں کو غیر مستحکم کر سکتا ہے اور اہم تجارتی سمندری راستوں میں خلل کا باعث بن کر مشرق وسطیٰ کو مزید آگ و خون کی لپیٹ میں لے سکتا ہے۔