تہران میں جاری جنگ کو ایک ماہ کا عرصہ گزر چکا ہے، جس کے بعد ایرانی شہریوں کی زندگیوں میں گہرے اثرات مرتب ہوئے ہیں۔ فضائی حملوں اور میزائلوں کے خوف کے سائے میں جینے والے شہریوں کا کہنا ہے کہ ملک میں سکیورٹی فورسز کی گرفت پہلے سے کہیں زیادہ سخت ہو چکی ہے۔
ایران میں انٹرنیٹ کی بندش اور مواصلاتی رابطوں پر پابندیوں کے درمیان شہریوں کو غیر ملکی میڈیا سے بات کرنے یا تصاویر باہر بھیجنے پر گرفتاریوں اور سنگین نتائج کی دھمکیاں دی جا رہی ہیں۔
معاشی صورتحال پر تبصرہ کرتے ہوئے تہران کی رہائشی 29 سالہ گلنار نے بتایا کہ ان کا آن لائن کاروبار گزشتہ دو ماہ سے مکمل بند ہے، جس کے باعث آمدنی کا کوئی ذریعہ نہیں بچا۔ انہوں نے کہا کہ گھر کے تمام افراد کے کام کرنے کے باوجود اب بنیادی ضروریات پوری کرنا بھی مشکل ہو گیا ہے اور تفریحی سرگرمیوں کا تصور ختم ہو چکا ہے۔
جزیرہ قشم کے رہائشی 42 سالہ صادق کا کہنا ہے کہ سیاحت کا شعبہ شدید متاثر ہوا ہے اور ہوٹل و کیفے خالی پڑے ہیں۔ ان کے مطابق ایندھن کے حصول کے لیے بھی گھنٹوں انتظار کرنا پڑتا ہے۔
تہران کے 40 سالہ رہائشی شایان نے بتایا کہ شہر میں اشیائے خوردونوش دستیاب ہیں اور معمولات زندگی رواں دواں نظر آتے ہیں، تاہم لوگوں میں شدید بے بسی پائی جاتی ہے۔ ان کا کہنا ہے کہ شہر اب ویران محسوس ہوتا ہے کیونکہ بیشتر لوگ نقل مکانی کر چکے ہیں۔
ایک 35 سالہ خاتون نے بتایا کہ میزائلوں اور دھماکوں کا شور اب ان کی روزمرہ زندگی کا حصہ بن چکا ہے۔ ان کے مطابق اس وقت تمام ایرانی شہریوں کی سب سے بڑی تشویش ملک کے تیل اور گیس کے بنیادی ڈھانچے کو نشانہ بنائے جانے کا خدشہ ہے۔
ترکی منتقل ہونے والی یوگا انسٹرکٹر کاتایون نے بتایا کہ ملک میں مسلسل خوف کی فضا ہے اور لوگوں کے پاس کھانے کے لیے پیسے نہیں رہے۔ انہوں نے کہا کہ زندگی گزارنا ناممکن ہو چکا ہے۔
تہران کی ایک 46 سالہ ڈینٹسٹ انسیہ کا کہنا ہے کہ وہ ہر گزرتے دن کے ساتھ امید کھو رہی ہیں۔ ان کے مطابق جنگ نے ان کی شخصیت کے ایک حصے کو ہمیشہ کے لیے ختم کر دیا ہے۔
سکیورٹی صورتحال کے حوالے سے 38 سالہ آرٹسٹ کاوہ نے بتایا کہ شہر میں جگہ جگہ چیک پوائنٹس قائم کر دیے گئے ہیں۔ انہوں نے کہا کہ سکیورٹی فورسز گاڑیوں کی تلاشی لے رہی ہیں اور لوگوں کے نجی فونز، تصاویر اور نوٹس تک چیک کیے جا رہے ہیں۔
کاوہ نے خدشہ ظاہر کیا کہ اگر واشنگٹن اور تہران کے درمیان کوئی معاہدہ طے پا گیا تو حکومت مخالفین کے لیے حالات مزید سنگین ہو جائیں گے، جس کے پیش نظر وہ ملک چھوڑنے پر غور کر رہے ہیں۔
لندن کی ایک عدالت نے روسی شہری مٹوئی رومیانتسیف کو ایک خاتون پر تشدد کرنے…
لاہور کے علاقے اکبری گیٹ کے قریب دیوار گرنے کا افسوسناک واقعہ پیش آیا ہے…
اقوام متحدہ کی انسانی حقوق کونسل کے ہنگامی اجلاس میں اقوام متحدہ کے انسانی حقوق…
پشاور ہائی کورٹ نے صوبے میں سڑکوں کی خستہ حالی سے متعلق دائر درخواستوں پر…
مشرق وسطیٰ میں جاری کشیدگی کے باعث متاثر ہونے والا فضائی آپریشن بتدریج بحال ہونا…
وفاقی وزیر داخلہ محسن نقوی نے جمعہ کے روز چینی سفارت خانے کا دورہ کیا…