اسحاق ڈار کا دورہ بیجنگ، ایران، امریکہ کشیدگی پر چین کو بریفنگ دینے کا فیصلہ

نائب وزیراعظم اسحاق ڈار آج بیجنگ کا دورہ کریں گے جہاں وہ چینی قیادت کو مشرق وسطیٰ کی کشیدہ صورتحال اور ایران و امریکہ کے درمیان جاری مذاکرات میں پاکستان کی ثالثی کوششوں پر بریفنگ دیں گے۔ یہ دورہ اسلام آباد میں ہونے والے چار ملکی اجلاس کے بعد انتہائی اہمیت کا حامل قرار دیا جا رہا ہے۔

ذرائع کے مطابق اسحاق ڈار چینی حکام کو پاکستان کے امن اقدام اور جاری سفارتی پیش رفت سے آگاہ کریں گے۔ اس دورے کا بنیادی مقصد خطے میں جاری کشیدگی کو کم کرنے کے لیے پاکستان کے کردار اور امریکہ و ایران کے مابین مذاکرات میں ہونے والی پیش رفت پر اعتماد میں لینا ہے۔

اس سے قبل اسلام آباد میں سعودی عرب، ترکی، مصر اور پاکستان کے وزرائے خارجہ کا ایک اہم اجلاس منعقد ہوا تھا۔ اس اجلاس میں مشرق وسطیٰ کی مجموعی صورتحال کا تفصیلی جائزہ لیا گیا اور تنازعات کے پرامن حل کے لیے ثالثی کی کوششوں پر اتفاق کیا گیا۔ اجلاس کے دوران شرکاء نے خطے میں جاری کشیدگی کو کم کرنے کی فوری ضرورت پر بھی زور دیا تھا۔

نائب وزیراعظم کی جانب سے سعودی وزیر خارجہ کے ساتھ بھی خطے میں رونما ہونے والی پیش رفت پر تبادلہ خیال کیا گیا ہے۔ بیجنگ کا یہ دورہ پاکستان کی جانب سے عالمی سطح پر خطے میں امن و استحکام کے لیے کی جانے والی کوششوں کا تسلسل ہے۔