اقوام متحدہ: برفانی الو اور ہتھوڑا مچھلی سمیت 40 نایاب انواع کو بین الاقوامی تحفظ حاصل

اقوام متحدہ کے کنونشن برائے تحفظِ مہاجر جنگلی حیات نے برازیل کے شہر کیمپو ورڈے میں منعقدہ کانفرنس کے اختتام پر 40 نئی اقسام کو بین الاقوامی تحفظ کی فہرست میں شامل کرنے کی منظوری دے دی ہے۔ اس اہم اجلاس میں 132 ممالک اور یورپی یونین کے نمائندوں نے شرکت کی۔

نئی فہرست میں ہیری پوٹر فلموں میں دکھائی جانے والی اسنوی آؤل یعنی برفانی الو کو بھی شامل کیا گیا ہے۔ اس کے علاوہ معدومیت کے خطرے سے دوچار ہڈسونیئن گاڈ وٹ نامی پرندہ اور گریٹ ہیمر ہیڈ شارک بھی تحفظ پانے والی انواع میں شامل ہیں۔

فہرست میں خشکی کے ممالیہ جانوروں میں دھاری دار لگڑ بھگا اور چیتا جبکہ آبی حیات میں دیو ہیکل اوٹر کو بھی جگہ دی گئی ہے۔ کنونشن کے تحت شامل ممالک قانونی طور پر پابند ہیں کہ وہ ان انواع کے مسکن کا تحفظ کریں، نقل مکانی کی راہ میں حائل رکاوٹوں کو دور کریں اور دیگر متعلقہ ریاستوں کے ساتھ تعاون کریں۔

سربراہی اجلاس سے قبل جاری کردہ رپورٹ کے مطابق کنونشن کے تحت درج انواع میں سے 49 فیصد کی تعداد میں کمی دیکھی جا رہی ہے اور ہر چار میں سے ایک قسم کو عالمی سطح پر معدومیت کا خطرہ لاحق ہے۔

کنونشن کی ایگزیکٹو سیکرٹری ایمی فرینکل کا کہنا ہے کہ اجلاس کے دوران تحفظ کے لیے مزید سخت اقدامات اور عزائم کا تعین کیا گیا ہے، تاہم ان انواع کی بقا کے لیے فوری عملی اقدامات کی ضرورت ہے۔

اقوام متحدہ کے ایک اور جائزے میں خبردار کیا گیا ہے کہ میٹھے پانی میں پائی جانے والی مہاجر مچھلیوں کی آبادی تیزی سے کم ہو رہی ہے، جس سے دریاؤں کے ماحولیاتی نظام اور کروڑوں لوگوں کا روزگار خطرے میں پڑ گیا ہے۔ مسکن کی تباہی، ضرورت سے زیادہ ماہی گیری اور آلودگی ان انواع کی بقا کے لیے سب سے بڑے چیلنج ہیں۔