برطانیہ: کیلوں کے کنٹینر سے 10 کروڑ ڈالر مالیت کی کوکین برآمد، 3 افراد گرفتار

برطانیہ میں حکام نے کیلے کے کنٹینر میں ایک سو ملین ڈالر مالیت کی کوکین سمگل کرنے کی کوشش ناکام بناتے ہوئے تین افراد پر فرد جرم عائد کر دی ہے۔ نیشنل کرائم ایجنسی کے مطابق اس کارروائی میں اٹھائیس سالہ جوشوا بیری، سینتیس سالہ ڈینیئل ڈومیٹرو اور چھیالیس سالہ اینڈریو سمتھ کو ساؤتھمپٹن سے گرفتار کیا گیا ہے۔

ملزمان میں سے جوشوا بیری کو جمعہ کے روز پہلی بار عدالت میں پیش کیا گیا جبکہ ڈینیئل ڈومیٹرو اور اینڈریو سمتھ کو دو ہفتے قبل حراست میں لیا گیا تھا۔ تینوں ملزمان کی اگلی پیشی سترہ اپریل کو متوقع ہے۔

برطانوی حکام کے مطابق یہ گرفتاری ساؤتھمپٹن بندرگاہ پر پکڑی گئی کوکین کی ایک بڑی کھیپ کی تفتیش کا حصہ ہے۔ بارڈر ایجنسی کے افسران نے کیلے سے لدے ایک شپنگ کنٹینر سے تقریباً ایک ٹن وزنی دو ہزار پاؤنڈ سے زائد کوکین برآمد کی تھی۔ یہ کنٹینر پانامہ کے راستے برطانیہ پہنچا تھا تاہم حکام کا کہنا ہے کہ اس کا ابتدائی سفر نکاراگوا سے شروع ہوا تھا۔ ضبط کی گئی منشیات کی مالیت پچھتر ملین برطانوی پاؤنڈ یعنی تقریباً ننانوے اعشاریہ نو ملین ڈالر ہے۔

قانون کے مطابق جرم ثابت ہونے پر ملزمان کو عمر قید کی سزا ہو سکتی ہے۔ نیشنل کرائم ایجنسی کے برانچ کمانڈر ساجو ساسیکمار نے اپنے بیان میں کہا ہے کہ یہ کوکین کی ایک بڑی مقدار تھی جو برطانیہ کی گلیوں تک پہنچائی جانی تھی۔ انہوں نے مزید کہا کہ اس کھیپ کو ضبط کرنے سے مجرمانہ گروہ کو بھاری مالی نقصان پہنچا ہے جس سے وہ مزید جرائم کے لیے فنڈز حاصل نہیں کر سکیں گے۔

عالمی سطح پر کیلے کی کھیپ میں کوکین چھپا کر سمگل کرنا ایک عام طریقہ بن چکا ہے۔ حالیہ مہینوں کے دوران روس، ناروے، ڈومینیکن ریپبلک، یونان اور بلغاریہ سمیت برطانیہ میں بھی اسی طرح کی کارروائیاں دیکھی گئی ہیں۔ قبل ازیں فروری دو ہزار چوبیس میں برطانوی حکام نے ساؤتھمپٹن بندرگاہ پر ہی کیلے کے ایک کنٹینر سے بارہ ہزار پانچ سو پاؤنڈ سے زائد کوکین پکڑی تھی جو ملک کی تاریخ میں منشیات کی سب سے بڑی برآمدگی تھی۔