ایران کشیدگی دراصل اسرائیل فلسطین جنگ کا تسلسل ہے، مولانا فضل الرحمان

جمعیت علماء اسلام ف کے سربراہ مولانا فضل الرحمان نے کہا ہے کہ ایران اسرائیل اور امریکہ کے مابین جاری تنازع دراصل فلسطین اور اسرائیل کے درمیان جنگ کا تسلسل ہے۔ اسلام آباد میں قومی اسمبلی کے باہر میڈیا سے گفتگو کرتے ہوئے انہوں نے کہا کہ فلسطین سے شروع ہونے والی یہ کشیدگی اب تمام عرب ممالک کو عبور کرتی ہوئی ایران تک پہنچ چکی ہے۔

مولانا فضل الرحمان نے خبردار کیا کہ اگر ایران کے خلاف اسرائیل کو کامیابی ملی تو پورے خطے پر صیہونی تسلط ناگزیر ہو جائے گا۔ انہوں نے زور دیا کہ صیہونی خطرے کا مؤثر جواب دینے کے لیے عالم اسلام کو ایک متحد بلاک بنانے کی ضرورت ہے۔

جے یو آئی کے سربراہ نے تجویز دی کہ اسلامی ممالک کو سیاست، باہمی تجارت اور دفاعی امور پر مشتمل ایک باضابطہ معاہدہ کرنا چاہیے۔ انہوں نے کہا کہ مسلم امہ کو یکجا ہو کر اپنے لیے ایک واضح لائحہ عمل طے کرنا ہوگا کیونکہ صیہونیت اور اسرائیلی توسیع پسندی کو روکنے کا یہی واحد راستہ ہے۔