ٹیلر سوئفٹ کے خلاف ٹریڈ مارک کی خلاف ورزی پر مقدمہ دائر

عالمی شہرت یافتہ گلوکارہ ٹیلر سوئفٹ کے خلاف لاس ویگاس سے تعلق رکھنے والی ایک فنکارہ نے ٹریڈ مارک حقوق کی خلاف ورزی کا مقدمہ دائر کر دیا ہے۔ مائرن ویڈ کی جانب سے پیر کے روز دائر کی گئی درخواست میں موقف اختیار کیا گیا ہے کہ ٹیلر سوئفٹ کی جانب سے جاری کردہ حالیہ البم دی لائف آف اے شوگرل ان کے طویل عرصے سے جاری اسٹیج شو کنفیشنز آف اے شوگرل کے حقوق کو متاثر کر رہی ہے۔

مائرن ویڈ کا کہنا ہے کہ ٹیلر سوئفٹ کی البم کی مارکیٹنگ ان کے اپنے کام کو مارکیٹ سے ختم کرنے کا باعث بن رہی ہے۔ انہوں نے عدالت سے استدعا کی ہے کہ وہ ٹیلر سوئفٹ کو اس البم کے نام کے استعمال سے روکیں تاکہ عوام میں ابہام پیدا نہ ہو۔ اس معاملے پر ٹیلر سوئفٹ اور ان کی ریکارڈ لیبل کمپنی یونیورسل میوزک گروپ کی جانب سے تاحال کوئی باضابطہ ردعمل سامنے نہیں آیا ہے۔

مائرن ویڈ کے وکیل جیمی پارکینن نے کہا کہ ہم ٹیلر سوئفٹ کی صلاحیتوں اور کامیابیوں کا احترام کرتے ہیں تاہم ٹریڈ مارک قوانین کا مقصد یہ ہے کہ ہر سطح کے تخلیق کار اپنے کام کے تحفظ کو یقینی بنا سکیں۔

ٹیلر سوئفٹ کی بارہویں البم دی لائف آف اے شوگرل گزشتہ سال اکتوبر میں ریلیز ہوئی تھی جس نے اسپاٹی فائی پر سٹریمنگ کے تمام ریکارڈ توڑ دیے اور یہ 2025 کی سب سے زیادہ فروخت ہونے والی البم بن گئی۔

درخواست گزار مائرن ویڈ نے نشاندہی کی کہ وہ 2014 سے لاس ویگاس ویکلی کے لیے کنفیشنز آف اے شوگرل کے عنوان سے کالم لکھ رہی ہیں اور اسی نام سے ایک اسٹیج شو بھی پیش کرتی آئی ہیں۔ ان کا کہنا ہے کہ یہ شو تفریحی صنعت کی مشکلات اور دلچسپ واقعات پر مبنی ہے۔

امریکی پیٹنٹ اینڈ ٹریڈ مارک آفس نے گزشتہ برس ٹیلر سوئفٹ کی جانب سے اسی نام کے ٹریڈ مارک کے حصول کی درخواست کو یہ کہتے ہوئے مسترد کر دیا تھا کہ اس سے مائرن ویڈ کے پہلے سے موجود ٹریڈ مارک کے ساتھ ابہام پیدا ہو سکتا ہے۔

مائرن ویڈ نے اپنی درخواست میں مزید کہا کہ ٹیلر سوئفٹ کے اس نام کے مسلسل استعمال سے ان کا اپنا برانڈ ختم ہو رہا ہے اور صارفین اب اصل کام کو ہی نقل سمجھنے لگے ہیں۔ انہوں نے عدالت سے مطالبہ کیا ہے کہ وہ ٹیلر سوئفٹ کو شوگرل کے نام کے استعمال سے روکنے کا حکم جاری کرے اور انہیں ہونے والے نقصان کے ازالے کے لیے مالی ہرجانہ بھی ادا کیا جائے۔