جنگی صورتحال: پاکستان کی جانب سے مشرقِ وسطیٰ کو غذائی اجناس کی ترسیل شروع

اسلام آباد (ذیشان یوسفزئی) امریکہ اور ایران کے درمیان کشیدگی اور بحری راستوں میں خلل کے باعث مشرق وسطیٰ میں پیدا ہونے والی غذائی قلت کو پورا کرنے کے لیے پاکستان نے خطے کے ممالک کو اشیائے خوردونوش کی برآمدات کا آغاز کر دیا ہے۔ وزارت تجارت کے ایک اعلیٰ عہدیدار کے مطابق اب تک خوراک کی چھ کھیپیں کویت بھجوائی جا چکی ہیں جہاں سے ان کی تقسیم دیگر علاقائی ممالک میں کی جا رہی ہے۔

وزیراعظم کی خصوصی ہدایات پر شروع کیے گئے اس عمل کے تحت مشرق وسطیٰ کے ممالک سے مشاورت کے بعد 56 اشیاء کی فہرست موصول ہوئی تھی۔ حکومتی جانچ پڑتال کے بعد 16 بنیادی اشیاء کو ملکی ضرورت کے پیش نظر برآمد کرنے سے روک دیا گیا جبکہ باقی 40 اضافی اشیاء کی بیرون ملک ترسیل جاری ہے۔

برآمد کی جانے والی مصنوعات میں چاول، چینی، خوردنی تیل، پھل، سبزیاں، گوشت، پولٹری اور ڈیری مصنوعات شامل ہیں۔ حکام کا کہنا ہے کہ ان آپریشنز کی نگرانی کے لیے روزانہ کی بنیاد پر اجلاس منعقد کیے جا رہے ہیں تاکہ صورتحال کا بغور جائزہ لیا جا سکے۔

حکومت نجی شعبے کی معاونت کر رہی ہے تاکہ تاجروں کو سہولیات اور لاجسٹک مدد فراہم کی جا سکے۔ اس مقصد کے لیے بزنس ٹو بزنس روابط کو بھی فروغ دیا جا رہا ہے۔ کچھ غذائی کھیپیں عمان کے راستے بھی بھیجی جا رہی ہیں جہاں سے سامان زمینی راستوں کے ذریعے اپنی حتمی منزل تک پہنچایا جاتا ہے۔

وزارت تجارت کے عہدیدار نے اس عزم کا اعادہ کیا ہے کہ صرف اضافی اشیاء ہی برآمد کی جا رہی ہیں تاکہ پاکستان کے اندر کسی بھی قسم کی قلت پیدا نہ ہو اور مقامی مارکیٹ میں رسد کا تسلسل برقرار رہے۔