غزہ: بچوں کی جانب سے گڑیا کے جنازے کی نقل، ویڈیو نے دل دہلا دیے

غزہ سے ایک دلخراش ویڈیو منظر عام پر آئی ہے جس نے دیکھنے والوں کو جذباتی کر دیا ہے۔ اس ویڈیو میں جنگ زدہ علاقے کے معصوم بچوں کو گڑیا کے ساتھ کھیلتے ہوئے دیکھا جا سکتا ہے، تاہم ان کا کھیل معمول کے کھیلوں سے بالکل مختلف ہے۔

ویڈیو میں دیکھا جا سکتا ہے کہ بچے گڑیا کو اسٹریچر پر رکھ کر اس کی علامتی تجہیز و تکفین کی نقل کر رہے ہیں۔ یہ منظر اس گہرے نفسیاتی صدمے کی عکاسی کرتا ہے جو غزہ کے بچے جاری تنازع کے باعث برداشت کر رہے ہیں۔

ماہرین کا کہنا ہے کہ بچوں کا اس طرح کا رویہ اس سنگین نفسیاتی اور جذباتی دباؤ کا نتیجہ ہے جو انہیں اپنے اردگرد کے حالات سے ملا ہے۔ یہ مناظر اس بات کی غمازی کرتے ہیں کہ جنگ نے ان بچوں کے ذہنوں پر کتنے گہرے اثرات مرتب کیے ہیں۔

سوشل میڈیا پر یہ ویڈیو تیزی سے وائرل ہو رہی ہے، جس پر صارفین کی جانب سے شدید دکھ اور تشویش کا اظہار کیا جا رہا ہے۔ لوگ اس بات پر پریشان ہیں کہ تنازع کی زد میں آئے علاقے کے بچے کس طرح کے خوفناک حالات میں زندگی گزارنے پر مجبور ہیں۔