آبنائے ہرمز روس کے لیے کھلی ہے، کریملن کے معاون یوری اوشاکوف کا بیان

ماسکو سے کریملن کے معاون یوری اوشاکوف نے کہا ہے کہ آبنائے ہرمز روس کے لیے کھلی ہوئی ہے۔ روسی سرکاری ٹی وی چینل ویستی سے گفتگو کرتے ہوئے انہوں نے واضح کیا کہ روس کو اس اہم گزرگاہ تک رسائی حاصل ہے۔

ایران کے خلاف امریکہ اور اسرائیل کی کشیدگی کے باعث دنیا بھر کی تیل اور مائع قدرتی گیس کی تقریباً پانچویں حصے کی ترسیل تعطل کا شکار ہو چکی ہے جس کے نتیجے میں عالمی منڈی میں ایندھن کی سپلائی بری طرح متاثر ہوئی ہے اور قیمتوں میں نمایاں اضافہ دیکھنے میں آیا ہے۔

روسی وزارت خارجہ نے مارچ کے اختتام پر اپنے بیان میں کہا تھا کہ وہ ایران کی جانب سے آبنائے ہرمز کی ناکہ بندی کی مخالفت کرتے ہیں تاہم انہوں نے اس صورتحال کو وسیع تر عالمی تناظر میں دیکھنے پر زور دیا تھا۔

دریں اثنا فرانسیسی صدر ایمانوئل میکرون نے کہا ہے کہ آبنائے ہرمز کو طاقت کے زور پر کھولنے کے لیے فوجی آپریشن شروع کرنا غیر حقیقت پسندانہ اقدام ہوگا۔ یہ بیان امریکی صدر ڈونلڈ ٹرمپ کی جانب سے اتحادیوں کو اس گزرگاہ کو کھولنے کے لیے متحرک کرنے کے مطالبے کے بعد سامنے آیا ہے۔

جنوبی کوریا کے دورے کے دوران صحافیوں سے گفتگو کرتے ہوئے میکرون نے کہا کہ طاقت کے ذریعے آبنائے ہرمز کو آزاد کرانے کا خیال حقیقت سے دور ہے۔ انہوں نے خبردار کیا کہ یہ عمل نہ صرف طویل ثابت ہوگا بلکہ اس کے نتیجے میں وہاں سے گزرنے والے تمام جہازوں کو پاسداران انقلاب اور بیلسٹک میزائلوں کے خطرات کا سامنا کرنا پڑے گا۔