ایران کا ٹرمپ کا الٹی میٹم مسترد، خطے کو جہنم بنانے کی دھمکی

ایران نے امریکی صدر ڈونلڈ ٹرمپ کی جانب سے دی گئی ڈیڈ لائن کو مسترد کرتے ہوئے خبردار کیا ہے کہ اگر امریکا اور اسرائیل نے جارحیت جاری رکھی تو پورا خطہ جہنم بن جائے گا۔ خاتم الانبیاء سینٹرل ہیڈکوارٹرز کے ترجمان ابراہیم ذوالفقار نے سخت ردعمل دیتے ہوئے کہا کہ ایران کو شکست دینے کا خواب دیکھنے والے اس دلدل میں ڈوب جائیں گے اور خطے کے حالات ان کے لیے انتہائی تباہ کن ثابت ہوں گے۔

خطے میں کشیدگی کے باعث خلیجی ممالک شدید تشویش کا شکار ہیں۔ ایران نے گزشتہ روز خلیجی ریاستوں، عراق اور اسرائیل پر میزائل داغے، جس سے تنصیبات کو نقصان پہنچا۔ اطلاعات کے مطابق کویت میں بھی ڈرون اور میزائل حملوں کے بعد سائرن بجا دیے گئے ہیں۔ ایران کی جانب سے تیل کی ریفائنریز، گیس کی تنصیبات اور پانی کو صاف کرنے والے پلانٹس کو نشانہ بنانے کا سلسلہ جاری ہے، جس سے توانائی کے بنیادی ڈھانچے کو خطرات لاحق ہیں۔

اسرائیلی حکام کی جانب سے توانائی کے پلانٹس اور بجلی کے نیٹ ورکس کو نشانہ بنانے کے اشارے مل رہے ہیں، جو صدر ٹرمپ کی 48 گھنٹے کی ڈیڈ لائن کے ساتھ مطابقت رکھتے ہیں۔ اسرائیلی وزیراعظم نیتن یاہو نے اپنی فضائی مہم کے حوالے سے ویڈیو بیان جاری کیا ہے، جبکہ شمالی تہران میں ایک یونیورسٹی اور ہسپتال پر بھی حملے کیے گئے ہیں۔ ایرانی وزیر سائنس کے مطابق گزشتہ پانچ ہفتوں میں ملک بھر میں 30 سے زائد یونیورسٹیوں کو نشانہ بنایا جا چکا ہے۔

ایرانی وزیر خارجہ عباس عراقچی نے اقوام متحدہ کے سیکرٹری جنرل انتونیو گوتریس کو خط لکھ کر خبردار کیا ہے کہ بشہر نیوکلیئر پاور پلانٹ پر چوتھی بار حملے سے تابکاری کے اخراج کا شدید خطرہ پیدا ہو گیا ہے۔ دوسری جانب بین الاقوامی جوہری توانائی ایجنسی کے سابق سربراہ محمد البرادعی نے خلیجی ممالک اور عالمی برادری پر زور دیا ہے کہ وہ اس تباہی کو روکنے کے لیے فوری کردار ادا کریں۔ انہوں نے ٹرمپ کے اقدامات کو پاگل پن قرار دیتے ہوئے کہا کہ اس سے پورا خطہ آگ کے گولے میں تبدیل ہو سکتا ہے۔

دریں اثنا، ایران کے جنوب مغربی ضلع کوہگیلوئے میں ایک میزائل حملے کے نتیجے میں چار افراد ہلاک اور ایک زخمی ہو گیا ہے۔ حکام کے مطابق یہ حملہ کوہ سیاہ کے علاقے میں ٹیلی کمیونیکیشن اور براڈکاسٹ ٹاور پر کیا گیا، جسے تہران نے امریکی اور اسرائیلی کارروائی قرار دیا ہے۔