ٹرمپ کی دھمکی: ایران کا امریکا اور اسرائیل کو ‘جہنم کے دروازے کھولنے’ کا انتباہ

ایران کی اعلیٰ عسکری قیادت نے امریکی صدر ڈونلڈ ٹرمپ کی جانب سے دی جانے والی دھمکیوں کے جواب میں خبردار کیا ہے کہ اسلامی جمہوریہ کے خلاف کسی بھی جارحیت کا بھرپور اور فیصلہ کن جواب دیا جائے گا جو پورے خطے کو اپنی لپیٹ میں لے لے گا۔

خاتم الانبیاء سینٹرل ہیڈکوارٹرز کے کمانڈر میجر جنرل علی عبداللہی نے واضح کیا ہے کہ اگر ایران پر حملہ کیا گیا تو تہران بغیر کسی حد کے جوابی کارروائی کرے گا۔ انہوں نے تنبیہ کی کہ خطے میں موجود امریکی افواج اور اسرائیل کے زیر استعمال تمام تنصیبات کو مسلسل اور تباہ کن حملوں کا نشانہ بنایا جائے گا۔

میجر جنرل علی عبداللہی نے امریکی صدر کے بیان پر ردعمل دیتے ہوئے کہا کہ جارح اور جنگجو امریکی صدر نے مسلسل ناکامیوں کے بعد ایران کے قومی اثاثوں کو دھمکیاں دے کر ایک غیر متوازن اور مایوس کن اقدام کیا ہے۔ انہوں نے مزید کہا کہ ایران کی اعلیٰ ترین آپریشنل کمانڈ، جو فوج اور پاسداران انقلاب کے درمیان رابطہ کاری کرتی ہے، اپنے ہر انتباہ کو عملی جامہ پہنانے کی تاریخ رکھتی ہے۔

ایرانی کمانڈر نے مزید کہا کہ مسلط کردہ جنگ کے آغاز سے ہی ہم نے اپنے ہر کہے پر عمل کیا ہے اور اس پیغام کا سادہ مطلب یہ ہے کہ دشمن کے لیے جہنم کے دروازے کھول دیے جائیں گے۔ اس سے قبل ہیڈکوارٹرز کے ترجمان نے بھی خبردار کیا تھا کہ اگر دشمن نے جارحیت کا دائرہ کار بڑھایا تو پورا خطہ اس کے لیے جہنم بن جائے گا۔

یہ بیانات ایک ایسے وقت میں سامنے آئے ہیں جب ایران کی جانب سے آپریشن ٹرو پرومس 4 جاری ہے۔ حکام کے مطابق اس آپریشن میں سینکڑوں بیلسٹک اور ہائپرسونک میزائلوں کے ساتھ ساتھ ڈرونز کے ذریعے خطے میں موجود امریکی اور اسرائیلی ٹھکانوں کو نشانہ بنایا گیا ہے۔ ایرانی عسکری قیادت نے اعادہ کیا ہے کہ ان کی مسلح افواج ملکی خودمختاری کے دفاع اور کسی بھی اشتعال انگیزی کا منہ توڑ جواب دینے کے لیے مکمل طور پر تیار ہیں۔