اسرائیل کا ایران کے اہم پیٹرو کیمیکل مرکز پر طاقتور حملہ

اسرائیل کے وزیر دفاع اسرائیل کاٹز نے پیر کے روز اعلان کیا ہے کہ اسرائیلی افواج نے ایران کے سب سے بڑے پیٹرو کیمیکل کمپلیکس پر ایک طاقتور حملہ کیا ہے۔ اس حملے کا ہدف اسالویہ میں واقع وہ تنصیبات تھیں جو ایران کی پیٹرو کیمیکل پیداوار کا تقریباً 50 فیصد حصہ فراہم کرتی ہیں۔

اسرائیلی وزیر دفاع کا کہنا ہے کہ اس حملے کے بعد ایران کے دو بڑے مراکز غیر فعال ہو چکے ہیں، جو مجموعی طور پر ایران کی پیٹرو کیمیکل برآمدات کا تقریباً 85 فیصد حصہ ہیں۔ کاٹز نے اسے ایران کی معیشت کے لیے ایک کاری ضرب قرار دیا ہے۔

ایران کی نیشنل پیٹرو کیمیکل کمپنی نے سرکاری میڈیا کے ذریعے جاری بیان میں تصدیق کی ہے کہ پارس کے مقام پر واقع تنصیبات میں لگنے والی آگ پر قابو پا لیا گیا ہے اور اس واقعے میں کسی جانی نقصان کی اطلاع نہیں ملی ہے۔ کمپنی کا کہنا ہے کہ تکنیکی ماہرین نقصان کے تخمینے اور صورتحال کا جائزہ لے رہے ہیں۔

پیر کے روز ہی مقامی حکام اور فارس نیوز ایجنسی نے اطلاع دی کہ ایران کے شمالی علاقے مرو دشت میں واقع ایک اور پیٹرو کیمیکل کمپلیکس کو بھی نشانہ بنایا گیا ہے، تاہم وہاں بھی آگ پر قابو پا لیا گیا ہے اور حکام کے مطابق نقصان معمولی نوعیت کا ہے۔

اس سے قبل ہفتے کے روز جنوب مغربی صوبے خوزستان کے شہر ماہشہر میں واقع پیٹرو کیمیکل زون پر بھی حملہ کیا گیا تھا، جس میں مقامی حکام کے مطابق پانچ افراد ہلاک ہوئے تھے۔

اسرائیلی فوج کے ترجمان نداو شوشانی نے ایک سوال کے جواب میں کہا کہ جنگ اور مذاکرات ساتھ ساتھ جاری ہیں۔ انہوں نے الزام عائد کیا کہ ایران مذاکرات کو وقت حاصل کرنے کے لیے استعمال کر رہا ہے۔ انہوں نے مزید کہا کہ اگر جنگ بندی کا فیصلہ کیا گیا تو اسرائیلی فوج سیاسی قیادت کی ہدایات پر عمل کرنے کے لیے تیار ہے۔

وزیراعظم نیتن یاہو اور وزیر دفاع اسرائیل کاٹز نے فوج کو ایران کے قومی بنیادی ڈھانچے پر پوری طاقت کے ساتھ حملے جاری رکھنے کا حکم دیا ہے۔ اس سے قبل جمعہ کو نیتن یاہو نے دعویٰ کیا تھا کہ اسرائیلی حملوں نے ایران کی اسٹیل پیداوار کی صلاحیت کا تقریباً 70 فیصد حصہ تباہ کر دیا ہے۔

یاد رہے کہ گزشتہ ماہ بھی اسرائیل نے اسالویہ میں گیس کی تنصیبات کو نشانہ بنایا تھا، جس کے جواب میں ایران نے سعودی عرب، کویت اور قطر میں گیس اور تیل کے پلانٹس پر حملے کیے تھے۔ ایران نے دھمکی دی تھی کہ اگر اسرائیلی حملے جاری رہے تو وہ خلیجی خطے کے توانائی کے بنیادی ڈھانچے کو مکمل طور پر تباہ کر دے گا۔