وزیراعظم شہباز شریف اور ولی عہد محمد بن سلمان کا ٹیلی فونک رابطہ، سعودی عرب سے اظہار یکجہتی

وزیراعظم شہباز شریف اور سعودی ولی عہد شہزادہ محمد بن سلمان کے درمیان ٹیلی فونک رابطہ ہوا ہے جس میں سعودی عرب کے شہر الجبیل میں واقع آئل تنصیبات پر حملے کی شدید مذمت کی گئی ہے۔

وزیراعظم شہباز شریف نے اس موقع پر سعودی قیادت کو پاکستان کی جانب سے غیر متزلزل حمایت کا یقین دلایا۔ انہوں نے کہا کہ پاکستان اور سعودی عرب کے درمیان گہرے تاریخی اور برادرانہ تعلقات ہیں اور مشکل کی اس گھڑی میں پاکستانی قوم اور حکومت اپنے سعودی بھائیوں کے ساتھ کندھے سے کندھا ملا کر کھڑی ہے۔

بات چیت کے دوران وزیراعظم نے خطے میں بڑھتی ہوئی کشیدگی اور الجبیل آئل تنصیبات پر حملے کو تشویشناک قرار دیا۔ انہوں نے کہا کہ اس طرح کے واقعات خطے کے امن و استحکام کے لیے خطرہ ہیں۔ وزیراعظم نے سعودی ولی عہد کی جانب سے بحران کے دوران صبر و تحمل کا مظاہرہ کرنے کی پالیسی کو سراہتے ہوئے اسے دانشمندی اور بصیرت کا عملی نمونہ قرار دیا۔

شہباز شریف نے ولی عہد کو خطے میں امن و امان کی بحالی اور کشیدگی کم کرنے کے لیے پاکستان کی سفارتی کوششوں سے بھی آگاہ کیا۔ انہوں نے واضح کیا کہ پاکستان خطے میں قیام امن کے لیے دیگر ممالک کے ساتھ مل کر کردار ادا کرنے کے لیے پرعزم ہے تاکہ مزید کشیدگی کو روکا جا سکے۔

سعودی ولی عہد شہزادہ محمد بن سلمان نے پاکستان کی جانب سے حمایت اور یکجہتی کے اظہار پر وزیراعظم کا شکریہ ادا کیا۔ انہوں نے خطے میں قیام امن کے لیے پاکستان کی سفارتی کوششوں کو سراہتے ہوئے اس اعتماد کا اظہار کیا کہ دونوں ممالک موجودہ بحرانی صورتحال میں باہمی تعاون کا سلسلہ جاری رکھیں گے۔

وزیراعظم نے خادم الحرمین الشریفین شاہ سلمان بن عبدالعزیز آل سعود کے لیے بھی نیک خواہشات کا اظہار کیا اور دو طرفہ تعلقات کو مزید مستحکم کرنے کے عزم کا اعادہ کیا۔