مشرقِ وسطیٰ میں جنگ بندی کے بعد پاکستان کی خلیجی ممالک کے لیے پروازیں بحال

مشرق وسطیٰ میں جنگ بندی کے بعد پاکستان سے خلیجی ممالک کے لیے فضائی آپریشن بحال ہونا شروع ہو گیا ہے، تاہم ایران اور امریکا کے مابین کشیدگی کے باعث فضائی حدود کی جزوی بندش کے سبب آپریشن کی مکمل بحالی میں مزید وقت لگ سکتا ہے۔

ایوی ایشن ذرائع کے مطابق ملک بھر کے بڑے ہوائی اڈوں سے خلیجی ممالک کے لیے پروازوں کا سلسلہ دوبارہ شروع کر دیا گیا ہے اور ایئر لائنز کی جانب سے شیڈول کو معمول پر لانے کے لیے اقدامات جاری ہیں۔

لاہور کے علامہ اقبال انٹرنیشنل ایئرپورٹ سے دبئی، ابوظہبی، شارجہ، بحرین، کویت، دوحہ، جدہ اور دمام کے لیے نو پروازیں روانہ ہوئیں۔ اسی طرح اسلام آباد انٹرنیشنل ایئرپورٹ سے آٹھ، جناح انٹرنیشنل ایئرپورٹ کراچی سے اٹھارہ، پشاور سے چھ اور ملتان ایئرپورٹ سے چار پروازیں خلیجی ممالک کے لیے روانہ کی گئیں۔

ایئرپورٹ حکام کا کہنا ہے کہ کچھ ممالک میں فضائی حدود پر اب بھی جزوی پابندیاں عائد ہیں جس کی وجہ سے معمول کے مطابق پروازوں کی بحالی میں تاخیر کا سامنا ہے۔

ذرائع نے مزید بتایا کہ ایران اور امریکا کے مابین حالیہ کشیدگی کے باعث گزشتہ چالیس روز کے دوران پاکستان سے تین ہزار سے زائد پروازیں منسوخ کر دی گئی تھیں، جس سے ملکی ایوی ایشن کے نظام کو شدید مشکلات کا سامنا کرنا پڑا۔