لندن: 3 ملین ڈالر مالیت کا فیبرج انڈا اور گھڑی چوری کرنے والا شخص قید

لندن کے ایک پب سے لاکھوں پاؤنڈ مالیت کا فیبرجے انڈا اور گھڑی چوری کرنے والے شخص کو ساؤتھ وارک کراؤن کورٹ نے ستائیس ماہ قید کی سزا سنا دی ہے۔ انتیس سالہ ملزم اینزو کونٹیسیلو نے عدالت میں چوری اور فراڈ کے الزامات کا اعتراف کر لیا ہے۔

استغاثہ کے مطابق واقعہ نومبر دو ہزار چوبیس میں وسطی لندن کے علاقے سوہو میں واقع ڈاگ اینڈ ڈک پب کے باہر پیش آیا۔ ملزم نے اس وقت کی ایک ملازمہ کا گیونشی ہینڈ بیگ چوری کیا جس میں دو اعشاریہ آٹھ ملین ڈالر مالیت کا نایاب سبز اور سنہری فیبرجے انڈا اور گھڑی موجود تھی۔ بیگ میں لیپ ٹاپ، پرس اور دیگر قیمتی سامان بھی شامل تھا۔

عدالت کو بتایا گیا کہ یہ اشیاء کرافٹ آئرش وہسکی کمپنی کے ایک ایونٹ کا حصہ تھیں۔ یہ نایاب سیٹ دنیا بھر میں صرف سات کی تعداد میں تیار کیے گئے تھے جن کی قیمت لاکھوں ڈالر ہے۔ جج کیٹ لیوسی نے ریمارکس دیے کہ یہ ایک غیر معمولی کیس ہے کیونکہ ملزم نے محض موقع ملنے پر چوری کی اور اسے بیگ میں موجود اشیاء کی اصل مالیت کا کوئی اندازہ نہیں تھا۔

عدالت میں انکشاف ہوا کہ ملزم نے چوری کے بعد بیگ میں موجود بینک کارڈز کے ذریعے قریبی اسٹورز سے خریداری کی کوشش کی۔ ملزم کے وکیل نے موقف اختیار کیا کہ ان کا موکل بے گھر ہے اور کوکین کی لت میں مبتلا ہے۔ دورانِ سماعت یہ بھی بتایا گیا کہ ملزم نے چوری شدہ قیمتی سامان منشیات کے بدلے فروخت کر دیا تھا اور اب تک یہ اشیاء بازیاب نہیں کروائی جا سکیں۔

عدالت نے ملزم کو ستائیس ماہ قید کی سزا سنائی ہے جس کے تحت وہ اپنی سزا کا نصف حصہ جیل میں گزارے گا اور بقیہ مدت کے لیے اسے لائسنس پر رہا کیا جائے گا۔