بحرین کے بادشاہ کی جانب سے پاک ایران و امریکہ جنگ بندی میں پاکستان کے کردار کی تعریف

بحرین کے بادشاہ حمد بن عیسیٰ الخلیفہ نے وزیراعظم شہباز شریف سے ٹیلی فونک رابطہ کیا ہے اور ایران اور امریکہ کے درمیان جنگ بندی کروانے میں پاکستان کی کامیاب ثالثی پر گہری تعریف کا اظہار کیا ہے۔ بحرینی فرمانروا کا کہنا تھا کہ اس جنگ بندی سے خطے میں دیرپا امن کی راہیں ہموار ہوئی ہیں۔

وزیراعظم شہباز شریف نے پاکستان کی امن کوششوں کی حمایت پر بحرین کے بادشاہ کا شکریہ ادا کیا۔ اس موقع پر انہوں نے گزشتہ چھ ہفتوں کے دوران ہونے والے حملوں کے تناظر میں بحرینی قیادت کی جانب سے مثالی تحمل کا مظاہرہ کرنے کی تعریف کی۔ وزیراعظم نے حالیہ کشیدگی کے دوران قیمتی جانوں کے ضیاع پر تعزیت کا اظہار کیا اور زخمیوں کی جلد صحت یابی کے لیے دعا کی۔ دونوں رہنماؤں نے علاقائی امن و استحکام کے لیے مل کر کام جاری رکھنے پر اتفاق کیا۔

اس سے قبل فرانسیسی صدر ایمانوئیل میکرون نے بھی وزیراعظم شہباز شریف سے ٹیلی فون پر گفتگو کی اور ایران و امریکہ کے مابین جنگ بندی کے لیے پاکستان کی سفارتی کوششوں کو سراہا۔ فرانسیسی صدر نے دونوں فریقین کو مذاکرات کی میز پر لانے میں پاکستان کے کردار کو تسلیم کیا اور اسلام آباد میں ہونے والے آئندہ امن مذاکرات کی کامیابی کے لیے نیک خواہشات کا اظہار کیا۔

وزیراعظم نے فرانسیسی صدر کا شکریہ ادا کرتے ہوئے اس عزم کا اعادہ کیا کہ پاکستان خطے میں امن و استحکام کے لیے اپنی کوششیں جاری رکھے گا۔ اس دوران دونوں رہنماؤں نے لبنان میں جاری جارحیت پر شدید تشویش کا اظہار کیا اور تشدد اور ہلاکتوں کو فوری طور پر روکنے پر زور دیا تاکہ خطے میں امن قائم ہو سکے۔