وزیراعظم شہباز شریف کا پاکستانی قیادت کی تعریف کرنے پر صدر ٹرمپ کا شکریہ

وزیراعظم شہباز شریف نے امریکی صدر ڈونلڈ ٹرمپ کی جانب سے پاکستان کے لیے تعریفی کلمات پر ان کا شکریہ ادا کیا ہے۔ ایک سوشل میڈیا پوسٹ میں وزیراعظم نے عوام پاکستان، فیلڈ مارشل سید عاصم منیر اور اپنی جانب سے امریکی صدر کے خیر سگالی کے جذبات کو سراہا۔ وزیراعظم نے اپنے پیغام میں کہا کہ وہ امریکی صدر کے مہربان اور پروقار الفاظ پر ان کے تہہ دل سے مشکور ہیں۔

اس سے قبل امریکی صدر ڈونلڈ ٹرمپ نے اپنے ایک بیان میں پاکستان سمیت خطے کے متعدد اتحادی ممالک کا شکریہ ادا کیا تھا۔ امریکی صدر نے آبنائے ہرمز کے حوالے سے اہم سفارتی پیش رفت کا دعویٰ کرتے ہوئے کہا کہ اس کامیابی میں پاکستان اور دیگر ممالک کا کردار کلیدی رہا۔

ڈونلڈ ٹرمپ نے سوشل میڈیا پر اپنے پیغام میں پاکستانی قیادت کی تعریف کی اور اسے عظیم قرار دیا۔ انہوں نے مشرق وسطیٰ میں سیکیورٹی اور جغرافیائی سیاسی صورتحال میں بہتری کے لیے سعودی عرب، متحدہ عرب امارات اور قطر کی خدمات کو بھی سراہا۔ امریکی صدر کے مطابق ان ممالک نے علاقائی استحکام کے لیے بہادری اور بھرپور تعاون کا مظاہرہ کیا ہے۔