ایران آبنائے ہرمز پر امریکا کو بلیک میل نہیں کر سکتا، ڈونلڈ ٹرمپ

امریکی صدر ڈونلڈ ٹرمپ نے کہا ہے کہ ایران ایک بار پھر آبنائے ہرمز کو بند کرنے کی کوشش کر رہا ہے تاہم تہران کو متنبہ کیا کہ وہ امریکہ کو بلیک میل نہیں کر سکتا۔ وائٹ ہاؤس کے اوول آفس میں میڈیا سے گفتگو کرتے ہوئے امریکی صدر نے دعوی کیا کہ ایران کے ساتھ بات چیت مثبت سمت میں آگے بڑھ رہی ہے مگر امریکہ آبنائے ہرمز کے معاملے پر کسی قسم کا دباؤ قبول نہیں کرے گا۔ ڈونلڈ ٹرمپ نے اعلان کیا کہ وہ آج دن کے اختتام تک ایران کے حوالے سے اہم معلومات جاری کریں گے۔

اس سے قبل بحری سیکیورٹی اور شپنگ ذرائع نے اطلاع دی تھی کہ ہفتے کے روز دو تجارتی جہازوں پر اس وقت فائرنگ کی گئی جب وہ آبنائے ہرمز سے گزرنے کی کوشش کر رہے تھے۔ یہ واقعہ ایران کی جانب سے اس اہم آبی گزرگاہ پر دوبارہ کنٹرول سخت کرنے کے اعلان کے فوراً بعد پیش آیا۔ شپنگ ذرائع کے مطابق متعدد تجارتی جہازوں کو ایرانی بحریہ کی جانب سے ریڈیو پیغام موصول ہوا کہ توانائی کی یہ اہم گزرگاہ بند کر دی گئی ہے اور کسی بھی جہاز کو گزرنے کی اجازت نہیں ہے۔

دوسری جانب ایران کے سپریم لیڈر مجتبیٰ خامنہ ای نے ٹیلی گرام چینل پر اپنے پیغام میں دھمکی دی ہے کہ ایرانی بحریہ اپنے دشمنوں کو نئی تلخ شکستوں سے دوچار کرنے کے لیے تیار ہے۔

ہسپانیہ کے حوالے سے گفتگو کرتے ہوئے امریکی صدر نے ملک کی موجودہ صورتحال کو افسوسناک قرار دیا۔ ٹرمپ نے ہسپانیہ کی معیشت کے کمزور ہونے کا دعویٰ کیا اور نیٹو میں دفاعی بجٹ کے لیے جی ڈی پی کا پانچ فیصد خرچ نہ کرنے پر تنقید کی۔ انہوں نے واضح کیا کہ امریکہ کو اپنے اقدامات کے لیے کسی کی اجازت درکار نہیں اور اسپین کے پاس ایسی کوئی چیز نہیں جس کی امریکہ کو ضرورت ہو۔

ملکی امور پر بات کرتے ہوئے صدر ٹرمپ نے کہا کہ صحت کے شعبے میں اصلاحات لائی جا رہی ہیں اور ادویات کی قیمتوں میں پچاس سے اسی فیصد تک کمی کی گئی ہے۔ انہوں نے یہ دعویٰ بھی کیا کہ امریکہ میں منشیات کی اسمگلنگ میں نمایاں کمی واقع ہوئی ہے۔