لندن: یہودی فلاحی ادارے کی سابقہ عمارت پر آتش زنی، انسداد دہشت گردی پولیس کی تحقیقات شروع

برطانیہ کے انسداد دہشت گردی کے ادارے نے لندن میں واقع ایک عمارت پر آتش زنی کی کوشش کی تحقیقات شروع کر دی ہیں۔ یہ عمارت ماضی میں ایک یہودی فلاحی تنظیم کے زیر استعمال رہی ہے۔ میٹروپولیٹن پولیس کے مطابق یہ واقعہ جمعہ کی شب شمالی لندن کے علاقے ہینڈن میں پیش آیا۔

پولیس کو رات ساڑھے دس بجے کے قریب اطلاع ملی کہ ایک شخص نے دکانوں کی قطار کے قریب پہنچ کر ایک پلاسٹک کا تھیلا عمارت کے باہر رکھا اور اسے آگ لگا دی۔ پولیس کے مطابق تھیلے میں تین بوتلیں موجود تھیں جن میں آتش گیر مادہ بھرا ہوا تھا۔ تاہم بوتلیں مکمل طور پر نہ جل سکیں جس کے بعد ملزم موقع سے فرار ہو گیا۔

واقعے میں کسی قسم کا جانی نقصان نہیں ہوا اور عمارت کے دروازے کو معمولی نقصان پہنچا۔ عمارت کی کھڑکی پر جیوش فیوچرز نامی تعلیمی تنظیم کا بورڈ موجود ہے۔ یہودی برادری کو سکیورٹی فراہم کرنے والی تنظیم کمیونٹی سکیورٹی ٹرسٹ نے اس واقعے کی تصدیق کرتے ہوئے کہا ہے کہ یہ لندن میں یہودی املاک کو نشانہ بنانے کی ایک اور کوشش ہے۔

پولیس نے علاقے میں سکیورٹی سخت کر دی ہے۔ حکام کا کہنا ہے کہ اگرچہ ہینڈن میں ہونے والے اس حملے کو فوری طور پر دیگر واقعات سے نہیں جوڑا جا رہا، تاہم طریقہ کار میں مماثلت کے پیش نظر انسداد دہشت گردی کی ٹیمیں معاملے کی تفتیش کر رہی ہیں۔

شمالی لندن میں یہودی برادری کو نشانہ بنانے کے واقعات میں اضافہ ہوا ہے۔ بدھ کے روز ایک عبادت گاہ پر حملے کے شبہ میں دو افراد کو گرفتار کیا گیا تھا۔ اس سے قبل مارچ کے آخر میں گولڈرز گرین میں یہودی برادری کی چار ایمبولینسوں کو نذر آتش کیا گیا تھا۔ اس کیس میں حمزہ اقبال، ریحان خان اور ایک سترہ سالہ برطانوی نژاد پاکستانی نوجوان کو گرفتار کر کے فرد جرم عائد کی جا چکی ہے۔

اسی ہفتے بدھ کی شام ایران انٹرنیشنل نامی میڈیا ادارے کے دفتر پر بھی آتش گیر مادہ پھینکا گیا تھا۔ سائٹ انٹیلی جنس گروپ کے مطابق حرکات اصحاب الیمین الاسلامیہ نامی ایک تنظیم نے ان حملوں کی ذمہ داری قبول کرنے کا دعویٰ کیا ہے۔ کمیونٹی سکیورٹی ٹرسٹ کے مطابق برطانیہ میں 2025 کے دوران اب تک یہود مخالف واقعات کی تعداد تین ہزار سات سو تک پہنچ چکی ہے جو کہ تنظیم کی تاریخ میں دوسری بلند ترین سطح ہے۔