ایران سے مذاکرات: امریکی ایلچی پیر کی شام اسلام آباد پہنچیں گے، ڈونلڈ ٹرمپ

امریکی صدر ڈونلڈ ٹرمپ نے اعلان کیا ہے کہ ان کے نمائندے پیر کی شام اسلام آباد پہنچیں گے جہاں ایران سے متعلقہ صورتحال پر بات چیت کی جائے گی۔

سوشل میڈیا پلیٹ فارم ٹرتھ سوشل پر اپنے ایک بیان میں صدر ٹرمپ نے کہا کہ واشنگٹن تہران کو ایک انتہائی منصفانہ اور معقول معاہدہ پیش کر رہا ہے۔ انہوں نے امید ظاہر کی کہ ایران اس پیشکش کو قبول کر لے گا۔

امریکی صدر نے خبردار کیا کہ اگر ایران نے معاہدہ قبول نہ کیا تو نتائج سنگین ہوں گے۔ ٹرمپ نے دھمکی دی کہ اگر ایران نے پیشکش مسترد کی تو امریکہ ایران کے تمام پاور پلانٹس اور پلوں کو تباہ کر دے گا۔ انہوں نے مزید کہا کہ اب نرمی کا وقت ختم ہو چکا ہے اور معاہدہ نہ ہونے کی صورت میں وہ ہر ضروری اقدام اٹھانے کے مجاز ہوں گے۔

عالمی منڈی میں تیل کی قیمتوں میں کمی اور اسٹاک مارکیٹس میں تیزی اس وقت دیکھی گئی جب ایران نے آبنائے ہرمز کو دوبارہ کھولنے کا اعلان کیا تھا، جسے 28 فروری کو ٹرمپ اور اسرائیل کی جانب سے جنگ شروع کیے جانے کے بعد سے بند کر دیا گیا تھا۔

تاہم صدر ٹرمپ کی جانب سے ایرانی جہاز رانی کے خلاف ناکہ بندی جاری رکھنے کے اعلان کے بعد تہران نے ہفتے کے روز آبنائے کو بدستور بند رکھنے کا فیصلہ کیا ہے۔ ہفتے کے روز کم از کم دو بحری جہازوں نے اطلاع دی ہے کہ آبنائے کے قریب پہنچنے پر ان پر فائرنگ کی گئی ہے۔