روس اور ایران کے وزرائے خارجہ کا ٹیلی فونک رابطہ، مشرق وسطیٰ کی صورتحال پر تبادلہ خیال

روسی وزیر خارجہ سرگئی لاوروف اور ان کے ایرانی ہم منصب عباس عراقچی کے درمیان پیر کے روز ٹیلی فونک رابطہ ہوا جس میں مشرق وسطیٰ کی موجودہ صورتحال اور کشیدگی کے خاتمے پر تبادلہ خیال کیا گیا۔

روسی وزارت خارجہ کی جانب سے جاری کردہ بیان کے مطابق ایرانی وزیر خارجہ نے سرگئی لاوروف کو جنگ بندی کی خلاف ورزیوں سے متعلق تہران کے موقف سے آگاہ کیا۔ عباس عراقچی نے الزام عائد کیا کہ امریکہ کی جانب سے آبنائے ہرمز کی غیر قانونی ناکہ بندی اور ایرانی کنٹینر شپ کو قبضے میں لینا جنگ بندی معاہدے کی صریح خلاف ورزی ہے۔

روسی وزارت خارجہ نے اس بات پر زور دیا کہ جنگ بندی کو ان شرائط کے مطابق برقرار رکھا جانا چاہیے جو پاکستانی ثالثوں کی جانب سے طے کی گئی تھیں۔ ماسکو نے کشیدگی کو مزید بڑھنے سے روکنے اور مسلح تصادم کے دوبارہ آغاز سے بچنے کے لیے سفارتی کوششوں کو جاری رکھنے کی اہمیت کو اجاگر کیا۔

بات چیت کے دوران روس نے ایران اور خلیج فارس کی عرب ریاستوں کے مابین باہمی طور پر قابل قبول معاہدوں کے حصول کے لیے سہولت کاری کی پیشکش کو دہرایا۔ جواب میں ایرانی فریق نے اس عزم کا اظہار کیا کہ وہ آبنائے ہرمز سے روسی جہازوں اور کارگو کی بلا تعطل نقل و حمل کو یقینی بنانے کے لیے تمام ضروری اقدامات اٹھائے گا۔

یہ رابطہ ایسے وقت میں ہوا ہے جب امریکہ اور ایران کے مابین دو ہفتوں پر محیط جنگ بندی بدھ کو ختم ہو رہی ہے اور صورتحال میں دوبارہ غیر یقینی پائی جاتی ہے۔ گزشتہ ہفتے کے اختتام پر امریکی فورسز کی جانب سے ایرانی کارگو جہاز کو قبضے میں لینے اور اس کے ردعمل میں تہران کی جانب سے آبنائے ہرمز کو بند کرنے کے اقدامات کے بعد عالمی منڈی میں تیل کی قیمتوں میں اضافہ دیکھا گیا ہے۔

ایرانی وزارت خارجہ کے ترجمان اسماعیل بقائی کے مطابق تہران اس وقت امریکی تجویز کا جائزہ لے رہا ہے جو آرمی چیف اور چیف آف ڈیفنس فورسز فیلڈ مارشل عاصم منیر کے دورے کے دوران پیش کی گئی تھی۔ اگرچہ تہران کی جانب سے امن مذاکرات کے دوسرے دور کے لیے اسلام آباد ٹیم بھیجنے میں تذبذب پایا جاتا ہے تاہم سفارتی ذرائع اس پیش رفت کو اہم قرار دے رہے ہیں۔