ایپل کے سی ای او ٹم کک مستعفی، جان ٹرنس نئے سربراہ مقرر

ٹیکنالوجی کی دنیا کی معروف کمپنی ایپل کے سی ای او ٹم کک رواں برس اپنے عہدے سے سبکدوش ہو جائیں گے۔ کمپنی کی جانب سے پیر کے روز جاری کردہ اعلامیے کے مطابق ٹم کک کی جگہ ہارڈویئر انجینئرنگ کے سینئر نائب صدر جان ٹرنس نئے سی ای او ہوں گے۔

تبدیلی کے اس عمل کے بعد 65 سالہ ٹم کک ایپل کے بورڈ آف ڈائریکٹرز کے ایگزیکٹو چیئرمین کا عہدہ سنبھالیں گے، جہاں وہ آرتھر لیونسن کی جگہ لیں گے۔ ایپل میں 25 برس کا تجربہ رکھنے والے جان ٹرنس یکم ستمبر کو باقاعدہ طور پر سی ای او کے فرائض سنبھالیں گے۔

اپنے بیان میں ٹم کک کا کہنا تھا کہ ایپل کی قیادت کرنا ان کی زندگی کا سب سے بڑا اعزاز رہا ہے۔ انہوں نے کہا کہ وہ اپنی پوری توجہ اور محبت کے ساتھ اس ادارے سے وابستہ رہے ہیں اور انہیں فخر ہے کہ انہوں نے ایسی ٹیم کے ساتھ کام کیا جو جدت اور تخلیقی صلاحیتوں سے مالا مال ہے۔

ٹم کک نے جان ٹرنس کی صلاحیتوں پر اعتماد کا اظہار کرتے ہوئے کہا کہ وہ ایک انجینئر کا ذہن اور اختراع کرنے والے کی روح رکھتے ہیں، جو دیانتداری اور وقار کے ساتھ کمپنی کی قیادت کرنے کی مکمل اہلیت رکھتے ہیں۔

جان ٹرنس نے اپنی تقرری پر ردعمل دیتے ہوئے کہا کہ ایپل کے مشن کو آگے بڑھانا ان کے لیے باعث فخر ہے۔ انہوں نے اسٹیو جابز اور ٹم کک کے ساتھ کام کرنے کے تجربے کو اپنے کیریئر کا اہم ترین حصہ قرار دیا۔

ٹم کک نے 2011 میں ایپل کے شریک بانی اسٹیو جابز کے بعد کمپنی کی باگ ڈور سنبھالی تھی۔ اپنے 15 سالہ دور میں انہوں نے ایپل پے، ایپل ٹی وی اور ایپل میوزک جیسی خدمات کو وسعت دی، جن سے کمپنی کو سالانہ 100 ارب ڈالر سے زائد کی آمدنی ہوتی ہے۔ ان کے دور میں ایپل واچ اور ایئر پوڈز جیسی مصنوعات بھی متعارف کرائی گئیں، جس کے نتیجے میں کمپنی کی مارکیٹ ویلیو میں تقریباً 3.6 ٹریلین ڈالر کا اضافہ ہوا۔

تجزیہ کاروں کے مطابق یہ فیصلہ غیر متوقع نہیں ہے کیونکہ جان ٹرنس کا نام کافی عرصے سے ٹم کک کے ممکنہ جانشین کے طور پر لیا جا رہا تھا۔ تاہم، ویب ڈش سیکیورٹیز کے ٹیکنالوجی تجزیہ کار ڈین آئیوز کا کہنا ہے کہ یہ تبدیلی ایک ایسے نازک وقت پر ہو رہی ہے جب ایپل اپنی مصنوعی ذہانت یعنی اے آئی حکمت عملی میں بڑی تبدیلیاں لا رہا ہے۔ ماہرین کے مطابق ٹم کک کا اس اہم موڑ پر جانا کئی سوالات کو جنم دیتا ہے اور اب جان ٹرنس کے لیے ان کی جگہ لینا ایک بڑا چیلنج ہوگا۔