ہنگری: نیتن یاہو کے دورے پر گرفتاری کا عندیہ

ہنگری کے نو منتخب وزیراعظم پیٹر میگر نے واضح کیا ہے کہ اگر بین الاقوامی فوجداری عدالت کے جاری کردہ وارنٹ پر عمل درآمد کیا گیا تو اسرائیلی وزیراعظم بنجمن نیتن یاہو کی ہنگری آمد پر انہیں گرفتار کیا جا سکتا ہے۔ پیٹر میگر نے میڈیا سے گفتگو کرتے ہوئے کہا کہ ہنگری بین الاقوامی فوجداری عدالت کے نظام میں دوبارہ شمولیت اختیار کرنے کا ارادہ رکھتا ہے اور اس کا پابند ہوگا۔

پیٹر میگر کا کہنا ہے کہ کسی بھی ملک کے لیے یہ قانونی ذمہ داری ہے کہ اگر بین الاقوامی فوجداری عدالت کی جانب سے کسی مطلوب شخص کے وارنٹ گرفتاری موجود ہوں اور وہ ان کی حدود میں داخل ہو تو اسے حراست میں لیا جائے۔ انہوں نے تصدیق کی کہ اس حوالے سے اسرائیلی وزیراعظم کو اپنے ارادوں سے آگاہ کر دیا گیا ہے کہ ہنگری بین الاقوامی قوانین کی مکمل پاسداری کرے گا۔

اس سے قبل موجودہ وزیراعظم وکٹر اوربان کے اسرائیلی حکومت کے ساتھ قریبی تعلقات رہے ہیں۔ اوربان انتظامیہ نے 2025 میں نیتن یاہو کے متوقع دورہ ہنگری سے قبل بین الاقوامی فوجداری عدالت کے نظام سے دستبرداری کی جانب پیش قدمی کی تھی۔

یاد رہے کہ بین الاقوامی فوجداری عدالت نے 2024 میں غزہ میں جنگی جرائم کے الزامات کے تحت بنجمن نیتن یاہو اور سابق اسرائیلی وزیر دفاع یوو گیلنٹ کے وارنٹ گرفتاری جاری کیے تھے۔ تاہم اسرائیلی قیادت کی جانب سے ان تمام الزامات کی تردید کی جاتی رہی ہے۔